Самарқанд вилояти Пахтачи туманида Gentra автомобили йўлнинг белгиланмаган жойидан ўтаётган пиёдани уриб юборди. Бу ҳақда вилоят ИИБ ЙҲХБ ахборот хизмати хабар берди.
Маълум қилинишича, ҳодиса 3 январь куни соат 20:00 ларда М-37 халқаро автомобиль йўлининг 137-километрида содир бўлган. Навоий—Самарқанд йўналишида келаётган Gentra ҳайдовчиси Пахтачи тумани “Ҳайит Элбеги” маҳалласи ҳудудида бетон тўсиқдан ошиб ўтаётган пиёдани уриб юборган.
ЙТҲ оқибатида оғир тан жароҳатлари олган пиёда ҳодиса жойида вафот этган.
Қашқадарё вилояти Миришкор туманида ҳам юз берган йўл-транспорт ҳодисаси оқибатида бир киши вафот этган.
Қайд этилишича, туманнинг “Янгиҳаёт” маҳалласи “Чандир” қишлоғи ҳудудидан ўтган йўлда ҳаракатланаётган Nexia машинаси йўлнинг қарама-қарши томонидан кетаётган пиёдани уриб юборган. Оғир тан жароҳатлари олган пиёда кўрсатилган тиббий муолажаларга қарамасдан шифохонада вафот этган
Ҳолат юзасидан ҳайдовчига нисбатан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш оқибатида одам ўлимига сабаб бўлиш) билан жиноят иши қўзғатилган.
Эслатиб ўтамиз, Сурхондарё вилояти Жарқўрғон туманида ноябрь ойида содир бўлган иккита йўл-транспорт ҳодисаси оқибатида тўрт киши ҳалок бўлганди.
Изоҳ (0)