Қамчиқ довонида юк автомобили иштирокида содир бўлган йўл-транспорт ҳодисаси оқибатида икки киши ҳалок бўлди. Бу ҳақда ИИВ ЙҲХХ ахборот хизмати хабар берди.
Маълум қилинишича, 9 январь куни соат 20:30 ларда Наманган вилоятининг Поп тумани ҳудудидан ўтувчи А-373 автомобиль йўлининг 225-километрида Водий—Тошкент йўналишида ҳаракатланиб келаётган Chasman русумли юк автомобили ҳайдовчиси 36 ёшли Н. тезликни оширгани сабабли рул бошқарувини йўқотган ва йўлни иккига ажратиб турувчи темир тўсиққа урилиб ағдарилган. ЙТҲ натижасида транспорт воситасида ёнғин юзага келган.
Ёнғин ўт ўчирувчилар томонидан бартараф этилган. Ҳодиса оқибатида ҳайдовчи Н. ва йўловчиси олган тан жароҳатлари туфайли воқеа жойида вафот этган. Ҳозирда ушбу ЙТҲ юзасидан суриштирув ишлари олиб борилмоқда.
Аввалроқ Андижон вилояти Шаҳрихон туманида Cobalt машинаси ёниб кетгани, Андижонда йўл четида турган Nexia'да ёнғин чиққани, Қамчиқ довонида лак-бўёқ ортилган юк машинаси ёниб кетиши оқибатида бир неча киши жабрлангани тўғрисида хабар берилганди. Шунингдек, Қашқадарёда Damas билан тўқнашган Captiva ёниб кетганди.
Изоҳ (0)