2024 йилда Польша армиясининг профессионал ҳарбий хизматчилари сони 10 минг кишига оширилади. Бу ҳақда Польша миллий мудофаа вазири ўринбосари Павел Бейда маълум қилди.
PAR агентлигининг хабар беришича, ҳудудий мудофаа кучлари ва кўнгиллилар сони ҳам ортади.
“2024 йил учун ҳарбий хизматчиларнинг иш ҳақи бўйича режалаштирилган харажатлар 135,5 минг профессионал ҳарбий хизматчини қўллаб-қувватлаш имконини беради”, — деди Бейда ва “бу қарийб 10 минг профессионал ҳарбий хизматчига ўсиш” эканлигини таъкидлади.
Жумладан, контрразведка ва разведка хизмати офицерлари сони оширилади.
“Жами 3320 нафар офицер бўлади. Бу дегани 2024 йилда уларнинг сони 2023 йилга нисбатан 300 нафарга кўп бўлади”, — деди вазир ўринбосари.
Унинг қўшимча қилишича, профессионал ҳарбий хизматчилар сонини кўпайтиришдан ташқари, ҳудудий мудофаа қўшинларини 3 мингга, шунингдек, ихтиёрий ҳарбий хизматни ўтаётганлар сонини 5 мингга ошириш режалаштирилган.
“Бундан ташқари, Польша Қуролли Кучларида ҳарбий машғулотлар давомида 20 минг фаол захирадаги аскар ва 5 минг пассив захира аскарлари бўлади”, — деди Мудофаа вазирлиги раҳбари ўринбосари.
Ҳозирда Польша армиясининг умумий сони 193 минг кишидан ошади. Профессионал ҳарбий хизматчилар сони қарийб 125,5 минг кишини ташкил этади.
Изоҳ (0)