Польшада президент саройига меҳмон сифатида таклиф этилган собиқ ИИВ раҳбари ва унинг ўринбосари ҳибсга олинди

Польша полицияси мамлакат собиқ ички ишлар вазири Мариуш Камински ва унинг ўринбосари Мацей Вонсикни қўлга олди, деб хабар бермоқда RMF24.

Ҳодиса 9 январь куни кечқурун Варшавадаги президент саройида юз берди, у ерда сиёсатчилар Польша етакчиси Анжей Дуданинг таклифига биноан президент маслаҳатчиларини тайинлаш маросимига меҳмонга келган эди.

Ҳибсга олиш пайтда президентнинг ўзи қароргоҳда бўлмаган: у Белведер саройига Беларусь мухолифати етакчиси Светлана Тихановская билан учрашув ўтказишга кетган, шундан сўнг сиёсатчилар билан гаплашмоқчи бўлган.

Полициянинг таъкидлашича, Камински ва Вонсик 8 январь куни чиқарилган суд қарорига биноан ҳибсга олинган. Сиёсатчилар бундан ҳайрон қолишган, лекин қаршилик кўрсатишмаган.

Польша президенти канселярияси президент меҳмонларининг ҳибсга олиниши Польша давлати қадр-қимматини ерга уришини қайд этди.

Сиёсатчилар ҳибсга олинганидан кейин президент саройи ёнида норозилик митинги бўлиб ўтди, унда 300 га яқин одам йиғилди.

Protest przed Pałacem Prezydenta @AndrzejDuda @RMF24pl pic.twitter.com/BsmsOc9agT

— Magda Grajnert (@MagdaGrajnert) January 9, 2024

2015 йилда Варшава суди Мариуш Камински ва Мацей Вонсикларни 2007 йилдаги “ер иши” деб аталадиган ишда мансаб ваколатларини суиистеъмол қилганликда айблаб, уч йиллик қамоқ жазосига ҳукм қилганди. Камински ўшанда Польшанинг Коррупцияга қарши кураш марказий бюросини бошқарар эди. Ўша йили Польша президенти Анжей Дуда Камински ва Вонсикларни афв этди. Бироқ 2023 йилда Олий суд қарорни бекор қилди ва ишни янги суд муҳокамасига юборди. Декабрь ойи охирида суд Камински ва Вонсикни икки йиллик қамоқ жазосига ҳукм қилди. Шунингдек, улар “Қонун ва адолат” партиясидан Польша Сеймидаги ўринларидан маҳрум қилинди.