Ироқ бош вазири Муҳаммад Шиа ас-Суданий хорижий ҳарбий қўшинларнинг мамлакатдан олиб чиқилиши бошланганини эълон қилди. Бу қарор “Ҳизбуллоҳ ан-Нужаба”нинг дала қўмондони Муштоқ Жавад Қосим ал-Жаварийнинг Бағдодда Америка зарбасидан ҳалок бўлганидан кейин қабул қилинган.
“Ҳукумат халқаро коалиция кучларининг Ироқда бўлишини бутунлай тўхтатиш чораларини кўрувчи икки томонлама қўмита ишини бошлаш санасини белгиламоқда”, — дейилади бош вазир идораси баёнотида.
Ироқ бош вазирининг баёноти Бағдодда дала қўмондони Муштақ Жавад Қосим ал-Жаварий ўлдирилган зарбадан бир кун ўтиб янгради. Пентагон ҳужум учун масъулиятни ўз зиммасига олди ва ўлдирилган шахс ‘‘Америка ҳарбий хизматчиларига ҳужумларни режалаштириш ва тайёрлашда иштирок этганини’’ таъкидлади.
Ўз навбатида, Ироқ ҳукумати Муштақ Жавад Қосим ал-Жаварий 2014 йилда “Исломий давлат”га қарши курашиш учун тузилган “Халқ сафарбарлик кучлари” гуруҳининг аъзоси эканлигини маълум қилди.
Reuters агентлиги маълумотларига кўра, 2014 йилдан буён “Исломий давлат”нинг қайта тикланишига йўл қўймаслик учун Ироқда 2,5 мингга яқин америкалик ҳарбийлар жойлаштирилган.
Изоҳ (0)