Ўзбекистонда хизмат кўрсатган артист, Киноарбоблар ижодий уюшмаси раиси Матёқуб Матчанов “Дарё”нинг YouTube’даги каналига берган интервьюсида бу йилги “Oltin Humo” миллий кинотақдимоти ҳайъат аъзолари фақат хорижликлардан тузилгани ва телевиденияда намойиш этилаётган сериал ва новеллаларга “Ўзбеккино”нинг ҳеч қандай алоқаси йўқлиги ҳақида гапирди.
— Олдинги миллий кинотақдимотлардан бу йилгиси тубдан фарқ қилади. Чунки бу йил ҳайъат аъзолари фақат хорижлик ижодкор ва мутахассислардан таркиб топди. Бу ўзимизнинг киношуносларга ишонмадик дегани эмас. Шунчаки хорижлик мутахассисларнинг жалб қилиниши кинотақдимот нуфузининг ошаётганидан далолат беради. Бу йил 21 та бадиий, 15 та ҳужжатли ва 4 та анимацион фильм ижодкорларидан ариза келиб тушган бўлса, уларнинг деярли барчаси ёшлар ҳисобланади. Номзодлар орасида машҳур, тажрибали режиссёрлар билан бирга, ёш, дебют иши билан қатнашаётганлар ҳам бор. Шунинг учун натижа у кутгандек бўлмаслиги мумкин, аммо муҳими унда қатнашиш ва тажриба орттириш, — дейди Матёқуб Матчанов.
Киноарбоблар ижодий уюшмаси раиси Матёқуб Матчанов “Ўзбеккино” фаолиятини йўққа чиқараётган баъзи инсонлардан ранжиши ҳақида ҳам айтиб ўтди.
— Тан олиш керак, аввалгига нисбатан халқимизнинг кинотеатрга келиши анча сустлашган. “Телевизорда қачон берасизлар?” деб кўп сўрашади. Ҳатто, баъзилар бадиий фильм билан сериалнинг ҳам фарқига бормай қўйган. Ҳеч кимнинг меҳнатини ерга урмоқчи эмасма-у, аммо савияси бир оз ёки анча паст бўлган сериалларни ҳам “Ўзбеккино” ишлаяпти деб ўйлашади. Фурсатдан фойдаланиб айтиб ўтаман, телеканалларда берилаётган сериал ва новеллаларга “Ўзбеккино”нинг умуман алоқаси йўқ, — дейди Матёқуб Матчанов.
Нега миллий тақдимотда оддий томошабиннинг фикри инобатга олинмайди? Бу саволга актёр қуйидагича жавоб берди:
— Фильм ҳақида фикр билдириш учун уни аввал кўриш керак. Кўрмай туриб, унга холис овоз бериб бўлмайди. 2023 йилда 21 та фильм фильм давлат кинотеатрларида намойиш этилган. Хусусий кинотеатрлар эса уни намойиш этишни хоҳламади. Чунки “Ўзбеккино” миллий мафкурани ривожлантириш учун фильмлар олади. “Ўзбеккино”нинг ҳамма жанрдаги фильмлари бор. Масалан, “Ўзбек қизи” жангари фильм бўлса-да, ўзбек аёлининг ватанпарварлигини улуғлайди. Тўғри у Американинг “пақ-пуқ” фильми каби компьютер графикаси билан бойитилмагандир. Чунки улар бозор учун фильм яратади, “Ўзбеккино”нинг асосий мақсади эса ўзбек мафкураси учун хизмат қилишдир.
Раҳбар бўлганим учун ҳар доим негатив хатлар бизга келиб тушади. “Нега сериалларга қарамайсизлар, бунисига қарамайсизлар”, деб ёзишади. Уларнинг ҳаммасига вазиятни тушунтиравериб чарчадик. “Барака топгурлар, бу бизнинг маҳсулотимиз эмас, уларга жавоб беролмаймиз. Хусусий телеканалларнинг виждони бўлмаса, халқини ҳурмат қилмаса, маиший муаммолардан ҳам паст бўлган сериалларини намойиш этса, биз уларга хўжайинлик қилолмаймиз. Гапирсак “Бу хусусий канал билганини қилади”, дейишади, — дейди Матёқуб Матчанов.
“Oltin Humo” миллий кинотақдимотидан тайёрланган махсус репортаж ва қизиқарли интервьюларни қуйида томоша қилишингиз мумкин.
Изоҳ (0)