Украина ички ишлар вазири Игор Клименко мамлакат аҳолисининг қўлида қанча қурол борлигини тахминан ҳам билмаслигини тан олди.
“Ҳозир аҳоли қўлида жуда кўп қурол бор, уларнинг қанчалигини ҳисоблаб бўлмайди. Бир миллион ёки икки миллион — бу бизнинг халқаро ҳамкорларимиз томонидан келтирилган рақамлар. Бу рақамлар ҳудудида ҳарбий ҳаракатлар олиб борилган бошқа мамлакатлар тажрибасини ҳисобга олган ҳолда кўрсатилган”, — деди Украина ИИВ раҳбари “Рада” телеканали эфирида.
Вазирнинг сўзларига кўра, Украинада ҳарбий ҳолат тугагандан сўнг, “аҳоли бу қуролларни топшириши, уларни олиб юриш ҳуқуқига эга бўлганлар эса уларни рўйхатдан ўтказиши керак”.
Рўйхатга олиш жараёни бир неча йил давом этиши мумкин. Ҳозирда “Тинч аҳоли қўлидаги қуроллар тўғрисида”ги қонун лойиҳаси ишлаб чиқилмоқда, деди Клименко. Унга кўра, бундай қонун лойиҳаси 2024 йил бошида биринчи ўқиш учун парламентга киритилиши мумкин.
Яқинда Закарпатияда маҳаллий депутат қишлоқ кенгаши йиғилишида учта граната портлатганини шарҳлар экан, Клименко “қурол ҳар қандай муассасага, ўқув муассасаси, савдо маркази, вокзал, поезд ёки автобусга олиб кирилиши мумкин”лигини тан олди.
“Украинада қуролга эга бўлишга рухсат берилган 49 минг фуқаро бор”, — деди вазир.
Изоҳ (0)