Украина бош вазири Денис Шмигаль халқаро донорлар билан шошилинч учрашув ўтказишни сўради, чунки Киев 2024 йилги бюджети бўйича “жуда юқори ноаниқлик”ка дуч келмоқда. Бу ҳақда Bloomberg агентлиги Украина бош вазирининг Донорларни мувофиқлаштириш бўйича идоралараро платформасига йўллаган мактубига асосланиб хабар берди.
“Макроиқтисодий барқарорликни сақлаб қолиш учун 2024 йил январидан бошлаб етарли даражада тезкор ташқи молиялавий ёрдам олишимиз жуда муҳим”, — дея Шмигалнинг мактубидан иқтибос келтиради Bloomberg.
Украина бош вазирининг сўзларига кўра, мувофиқлаштирувчи гуруҳ “шошилинч бюджет эҳтиёжларига” эътибор қаратиши керак. Унинг аниқлик киритишича, гап ҳукумат ишини сақлаб қолиш, ўқитувчилар ва давлат хизматчиларига тўловлар, шунингдек, пенсиялар ҳақида бормоқда.
“Биз 2024 йилда омон қолиш устуворликларига эришиш учун курашаётган бир пайтда (узоқ муддатли) тикланиш ва реконструкция лойиҳалари ҳақида ҳеч қандай муҳокамага ҳожат йўқ”, — дейилади мактубда.
Bloomberg қайд этишича, Украина иттифоқчиларининг хатга муносабати номаълум.
Украина иқтисодиёт вазири Юлия Свириденко Financial Times газетасига берган интервьюсида, агар Ғарб 2024 йил бошида молиявий ёрдам бермаса, Украина деярли 12 миллион кишининг маоши ва пенсияларини тўлашда кечикишларга дуч келиши мумкинлигини айтганди. Унинг аниқлик киритишича, Киев 500 минг давлат хизматчиси ва 1,4 миллион ўқитувчига, шунингдек, 10 миллион нафақахўрга ўз вақтида пул бера олмаслиги мумкин.
Изоҳ (0)