Ukraina ichki ishlar vaziri Igor Klimenko mamlakat aholisining qo‘lida qancha qurol borligini taxminan ham bilmasligini tan oldi.
“Hozir aholi qo‘lida juda ko‘p qurol bor, ularning qanchaligini hisoblab bo‘lmaydi. Bir million yoki ikki million — bu bizning xalqaro hamkorlarimiz tomonidan keltirilgan raqamlar. Bu raqamlar hududida harbiy harakatlar olib borilgan boshqa mamlakatlar tajribasini hisobga olgan holda ko‘rsatilgan”, — dedi Ukraina IIV rahbari “Rada” telekanali efirida.
Vazirning so‘zlariga ko‘ra, Ukrainada harbiy holat tugagandan so‘ng, “aholi bu qurollarni topshirishi, ularni olib yurish huquqiga ega bo‘lganlar esa ularni ro‘yxatdan o‘tkazishi kerak”.
Ro‘yxatga olish jarayoni bir necha yil davom etishi mumkin. Hozirda “Tinch aholi qo‘lidagi qurollar to‘g‘risida”gi qonun loyihasi ishlab chiqilmoqda, dedi Klimenko. Unga ko‘ra, bunday qonun loyihasi 2024-yil boshida birinchi o‘qish uchun parlamentga kiritilishi mumkin.
Yaqinda Zakarpatiyada mahalliy deputat qishloq kengashi yig‘ilishida uchta granata portlatganini sharhlar ekan, Klimenko “qurol har qanday muassasaga, o‘quv muassasasi, savdo markazi, vokzal, poyezd yoki avtobusga olib kirilishi mumkin”ligini tan oldi.
“Ukrainada qurolga ega bo‘lishga ruxsat berilgan 49 ming fuqaro bor”, — dedi vazir.
Izoh (0)