Давлат хавфсизлик хизмати ходимлари томонидан Сирдарё, Фарғона вилоятлари ва Тошкент шаҳрида қонунбузилиши ҳолатларига чек қўйилди.
Маълум қилинишича, ДХХнинг Сирдарё вилояти бўйича бошқармаси ходимлари томонидан Иқтисодий жиноятларга қарши курашиш департаменти билан ҳамкорликда тезкор тадбир ўтказилган. Тадбирда Мирзаобод туманидаги қишлоқ хўжалиги маҳсулотлари етиштиришга ихтисослашган МЧЖ юристи логистика хизматлари кўрсатиш билан шуғулланувчи масъулияти чекланган жамият раҳбаридан 14 минг доллар ва 12 миллион сўм олган вақтида қўлга олинган.
Аниқланишича, у вилоят прокуратураси томонидан мазкур МЧЖ раҳбарига нисбатан Жиноят кодексининг 167-моддаси билан қўзғатилган жиноят иши доирасида МЧЖнинг бекор қилинган гувоҳномасини тиклаш ва солиқ идоралари томонидан 1 миллиард 950 миллион сўм қўшилган қиймат солиғини олишга қўйилган таъқиқ масаласини ижобий ҳал қилиб беришни ваъда қилган.
ДХХ Тошкент шаҳар бўйича бошқармаси ва департамент ходимлари ҳамкорлигида ўтказилган тезкор тадбирда, Иқтисодиёт ва молия вазирлиги ҳузуридаги Кадастр агентлиги бош мутахассиси Мирзо Улуғбек туманида яшовчи фуқарога нисбатан ички ишлар органлари томонидан жиноят иши қўзғатмаслик масаласини юқори лавозимда ишловчи танишлари орқали ҳал қилиб бериш эвазига 6 минг доллар олган вақтида ушланган.
Тошкент шаҳар Мирзо Улуғбек тумани ички ишлар органлари фаолиятини мувофиқлаштириш бошқармаси катта инспектори фуқародан ноқонуний тарзда 4 минг доллар олган вақтида Давлат хавфсизлик хизмати ва прокуратура органлари томонидан ушланган.
Аниқланишича, у Жиноят кодексининг 251-прим 1-моддаси (кучли таъсир қилувчи ёки заҳарли моддаларни қонунга хилоф равишда муомалага киритиш) 3-қисми билан 7 йил муддатга озодликдан маҳрум қилинган маҳкумни Навоий шаҳридаги 11-сонли жазони ижро этиш муассасасидан Чирчиқ шаҳрида жойлашган 14-сонли жазони ижро этиш муассасасига кўчирилишида ёрдам беришини ваъда қилган.
ДХХ Фарғона вилояти бўйича бошқармаси ходимлари томонидан департамент билан ҳамкорликда ўтказилган тезкор тадбирда эса Фарғона шаҳрида яшовчи 39 ёшли собиқ ҳарбий хизматчи ўзининг мансабдор танишлари ёрдамида маҳаллий фуқарони ички ишлар органлари тизимига ишга киритиб қўйиш эвазига 4 минг доллар олган вақтида ушланган.
Ҳозирда мазкур шахсларга нисбатан жиноят ишлари қўзғатилиб, тергов ҳаракатлари олиб борилмоқда.
Аввалроқ Бухоро шаҳри “Абу Али ибн Сино” МФЙ ҳоким ёрдамчиси кредит маблағларини ўзлаштирганликда айбланиб, жиноят иши қўзғатилгани, Янгийўл тумани ҳокими маҳаллалардаги 6 нафар ёрдамчисини жазолагани тўғрисида хабар берилганди.
Изоҳ (0)