Қозоғистон Ички ишлар вазирлигининг маъмурий полиция қўмитаси Россиянинг шов-шувли “Слово пацана. Кров на асфальте” (“Йигит сўзи. Асфальтдаги қон”) сериалини текширишни сўраганини маълум қилди. Бу ҳақда Tengrinews хабар берди.
Журналистлар Ички ишлар вазирлигига рус сериаллари қозоғистонлик ёшлар учун зарарлими ва уни кўриш мамлакатда тақиқланиши мумкинми, деган савол билан мурожаат қилди.
Қўмита маълумотларига кўра, улар Маданият ва ахборот вазирлигига ушбу сериалнинг ноқонунийлигини таҳлил қилиш талаби билан хат жўнатган. Агар департамент буни шундай деб ҳисобласа, Қозоғистонда “Йигит сўзи. Асфальтдаги қон” тақиқланиши мумкин.
“Бизда Маданият ва ахборот вазирлиги бор, улар онлайн-платформаларни мониторинг қилиш бўйича ваколатли органдир. Қонунга мувофиқ, конституциявий тузумни зўравонлик билан ўзгартиришга чақириш, пропаганда, мамлакат яхлитлигига тажовуз қилиш, давлат хавфсизлигига путур етказиш, урушни тарғиб қилиш, ижтимоий, ирқий, миллий, диний, синфий устунлик, шафқатсизлик ва зўравонлик маданияти, суицид, порнография, гиёҳвандлик ва ҳоказоларни тарғиб қилиш ноқонуний контентга киради. Агар улар сериални ноқонуний контент деб ҳисобласа, тегишли чоралар кўрилади”, — деди ИИВ Маъмурий полиция қўмитаси раисининг ўринбосари Ренат Зулхаиров.
Ички ишлар вазирлиги Маъмурий полиция қўмитаси раиси Кайсар Султонбоев замонавий мавзуда ёшлар учун қизиқарли сериаллар суратга олинса, зўравонлик, қотиллик, безорилик, ўз жонига қасд қилиш ҳолатлари бўлмаслиги кераклигини айтди.
“Хулоса қилиб айтганда, айрим фильмларни ёшларга сал бошқачароқ тарбия бериш учун зўравонлик саҳналарисиз суратга олиш керак. Шу муносабат билан, салбий мазмундаги сериаллар юзасидан вазир номидан барча ҳудудий бошқармалар Халқ таълими вазирлиги билан биргаликда ўқувчилар ва талабалар билан криминал мафкура фақат ё ўлимга, ё қамоққа олиб келади, деган мавзуда тегишли маърузалар ўтказмоқда”, — деди Кайсар Султонбоев.
Изоҳ (0)