Қозоғистонда ҳаво 38 даражагача совиб кетиши кутилмоқда

Синоптиклар 14 декабрь куни Қозоғистон бўйлаб кузатиладиган об-ҳаво прогнозини эълон қилди. Бу ҳақда Tengrinews хабар берди.

Метеорологларнинг маълумотларига кўра, республиканинг аксарият ҳудудига шимоли-ғарбий совуқ антициклон таъсир кўрсатади, бунда аёзли об-ҳаво, асосан, ёғингарчиликсиз давом этади. Мамлакат ғарбида қор ёғиши, жануби ва жануби-шарқида эса бўрон бўлиши кутилмоқда.

Жанубда, Атираунинг ва Манғистов вилоятларининг шарқида чанг бўрони, жанубда, Жамбил вилоятининг тоғли ҳудудларида туман тушиши кутилмоқда. Республика бўйлаб кучли шамол прогноз қилинган.

“Кечаси шимолда, Олмаота ва Жамбил вилоятларининг тоғли ҳудудларида 33-38 даража совуқ сақланиб қолади, марказда, Еттисув вилоятининг тоғли ҳудудларида 31-36 даража совуқ бўлади”, — дейилади хабарда. 

Туркистон ва Жамбил вилоятларининг тоғли довонларида вақти-вақти билан секундига 30 метр ва ундан кўпроқ кучли шамол эсади.