“Слово пацана” муаллифи аёлларнинг жиноий гуруҳлари ҳақида китоб ёзади

“Слово пацана” (“Йигит сўзи”) китобининг муаллифи Роберт Гараев аёлларнинг жиноий гуруҳлари ҳақида ҳам китоб ёзади. Бу ҳақда Forbes хабар берди.

Роберт Гараевнинг китоби асосида суратга олинган “Слово пацана” сериали кенг оммалашди. Эҳтимол, Гараевнинг аёл гуруҳларига бағишланадиган янги китоби асосида ҳам фильм суратга олиниши мумкин. Ёзувчининг сўзларига кўра, “аёлларнинг жиноий дунёси” ҳам қўрқинчли.

“Аёлларнинг жиноий дунёси эркакларники каби катта эмас, шунинг учун ҳам у қадар таниқли эмас. Аммо аёлларнинг бир-бири ва ташқи дунё билан ўзаро муносабати нуқтаи назаридан, вазият жуда қўрқинчли”, — деди Роберт Гараев.

Гараевнинг биринчи китоби “Слово пацана. Криминальний Татарстан 1970-2010-х” бўлиб унда 1980–1990 йилларда Татаристондаги ёшлар гуруҳлари ҳақида сўз боради. Энди қизлар гуруҳи ҳақида ҳам шундай китоб ёзиш режалаштирилмоқда. Муаллифнинг Forbes нашрига айтишича, аёллар тўдалари ҳақида китоб яратиш ғояси анча олдин пайдо бўлган, аммо аёллар жиноий ўтмишлари ҳақида гапиришни истамаган. 

Аммо китобим асосида “Йигит сўзи. Асфальтдаги қон” сериалининг муваффақияти ортидан вазият ўзгарди: аёллар ўз гуруҳлари ҳақида фаолроқ гапира бошлади, — дейди ёзувчи.