Тошкент шаҳри ва бешта вилоятдаги чекловлар киритилган газ заправкалар фаолиятини қисқа фурсатда тиклаш мақсадида тайёргарлик ишлари амалга оширилмоқда. Бу ҳақда “Ҳудудгазтаъминот” матбуот хизмати хабар берди.
Қайд этилишича, “Ҳудудгазтаъминот” томонидан ҳозирги вақтда табиий газни тенг тақсимлаш ва истеъмолчиларга бир маромда етказиб бериш бўйича барча зарурий чоралар кўрилмоқда. Табиий газ тўлиқ ҳажмда етказиб бериляпти, етишмовчилик кузатилмаяпти. Аммо айрим жойларда истеъмол ортгани сабабли газ босими пасайиши кузатилмоқда ва истеъмолчилар томонидан мурожаатлар келиб тушмоқда.
Муаммолар кузатилган жойларда газ таъминотини яхшилаш борасида соҳа мутахассислари томонидан барча керакли ишлар давом эттирилмоқда. 2023 йилнинг 13 декабрь куни газ таъминоти ташкилотлари томонидан аҳоли ва улгуржи истеъмолчиларга 113,5 миллион куб метр табиий газ етказиб берилди. Бундан ташқари, суюлтирилган газ истеъмолчиларига 2223 тонна ёқилғи етказилган.
“Айни вақтда чекловлар киритилган пойтахт, Самарқанд, Тошкент, Андижон, Наманган ва Фарғона вилоятларидаги АГТКШлар фаолиятини қисқа фурсатда тиклаш мақсадида тайёргарлик ишлари амалга оширилмоқда”, — дейилади хабарда.
Ҳудудларда авария ҳолатлари кузатилганда, мутахассислар жойига юборилмоқда ва улар муаммоларни бартараф этишмоқда.
Эслатиб ўтамиз, аҳоли истеъмолчиларида узилишларнинг олдини олиш мақсадида 13 декабрь куни пойтахт, Самарқанд, Тошкент, Андижон, Наманган ва Фарғона вилоятларидаги АГТКШларнинг фаолиятига қўшимча чекловлар киритилганди. “Ҳудудгазтаъминот” ҳозирги вақтда белгиланган график бўйича 1179 тадан 547 АГТКШ ишлаётганини маълум қилганди.
Изоҳ (0)