Шундай фильмлар борки, улар экранга чиқиши билан реал ҳаётдаги баъзи бир тенденцияларни ўзгартириб юборади. Қуйида шундай фильмлар ҳақида ҳикоя қиламиз.
“Форсаж”
Ҳозирга келиб, фильм физика ва мантиқ қонунларини бузаётган бўлса, 2000 йилларнинг бошида эса кўча пойгаларига қаратилган жуда оддий фильм эди. The New York Times маълумотига кўра, Монтгомери округида 2012—2017 йилларда премьераси бўлган учта қисмидан сўнг тезликни ошириш ва жарималар сони кескин ошган. Шу билан боғлиқ Монтгомери округидаги 200 мингга яқин жарималар ўрганиб чиқилган. “Форсаж-6”, “Форсаж-7,“ ва “Форсаж-8” премьераларидан сўнг жарималар сони бошқа вақтдагига қараганда 20 фоизга ошган. Жарималарнинг аксарияти кинотеатрлар атрофида содир этилганлиги маълум бўлди.
“Уйда ёлғиз”
“Уйда ёлғиз” фильмида Кевин Маккаллистер Budget юк машинасида саёҳат қилаётган оркестр гуруҳи билан уйга қайтади. Маълум бўлишича, юк машинасини танлаш тасодиф эмас бу реклама бўлиб, у ҳақидаги маълумотлар фильм чиққанидан кўп ўтмай маълум бўлди. Реклама бўйича менежер Жорж Симковскининг сўзларига кўра, фильм премьерасидан кейин Budget юк машиналарининг сотуви каррасига ортган.
“Рим таътиллари”
“Рим таътиллари” фильми Одри Хепбёрн учун омадли бўлди, Грегори Пек туфайли унинг исми Пекники билан бир қатордан жой олди. Ўша пайтда Голливудда актёрлар титрларга катта эътибор берган ва уларнинг исмлари қаерда туриши аҳамият касб этган. Одри “Рим таътиллари” фильмида бош ролни ижро қилганига қарамай, унинг номи Грегори Пекдан пастроқда туриши керак эди. Агенти орқали бу ҳақида эшитган актёр адолатни тиклайди, чунки у Одрини жуда яхши кўрган.
Хепбёрн ва Пек “Рим таътиллари” фильмида романтик қаҳрамонлар образини ижро этиб берган. Айниқса, Vesta мотоциклида олинган саҳналар жуда ажойиб чиққан. Кинокартинагача ҳам Vesta анча-мунча таниқли бўлган, лекин фильм премьерасидан кейин уларнинг савдоси рекордларни янгилаган.
“Қасоскорлар. Интиҳо”
“Қасоскорлар. Интиҳо” фильмида оддий кийимлардан бошланиб, қиммат машиналар билан якунланадиган рекламалар бисёр. Тасвирга олиш жараёни тугагандан сўнг, актёрларнинг бир қисми уйга, баъзилари бошқа картинада суратга тушишга кетади. Кутилмаганда ҳамма қўшимча саҳнани суратга олишга чақирилган, унда қаҳрамонлар қандайдир кафеда жимгина шаурма ейди. Нью-Йоркдаги турли муассаса эгаларининг таъкидлашича, премьерадан сўнг ҳеч қачон шаурма истеъмол қилмаган жуда кўплаб инсонлар тамаддихонага келишни бошлаган. Ro Ro‘s Chicken бошқарувчисининг маълумотларига кўра, фильм намойишидан кейин уларнинг емакхонасида шаурма савдоси 80 фоизга ошган.
“101 та далматин”
1986 йилда “101 далматин” фильмини томоша қилгандан сўнг инсонлар оммавий равишда далматин итларини боқиб олган, лекин кўп ўтмай итлардан воз кечган. Далматинлар инсонлар билан дўстлаша олади, лекин шу билан бирга жуда тажовузкор ҳисобланади. Улар ёш болалар билан унчалик ҳам яхши муносабатда бўлмайди ва жуда фаолдир. Афтидан, фильм ижодкорлари буни билган, шунинг учун улар фильмда далматинларни ёвуз ҳайвон сифатида тасвирлаган.
“Вендетта инқилоби”
1605 йилда Лондондаги Лордлар палатасини портлатиб юбориши керак бўлган, аммо қўлга олинган инқилобчи Гай Фокс Буюк Британияда Гай Фокс ниқоблари билан кўп йиллардан буён машҳур бўлиб келмоқда. Буюк Британияда одамлар Ҳеллоуин байрамида ва 5 ноябрь куни яъни, Гай Фокс кунини нишонлаганда Гай Фокс ниқобларини таққан. Ниқоблар “Вендетта инқилоби” фильми премьерасидан кейин бутун дунёга машҳур бўлди.
“Моҳир мерган”
Ҳарбий фильм ва сериалларни томоша қилиш туфайли инсонда ҳаётини ҳарбийлик билан боғлаш ва қаҳрамон бўлишга иштиёқ уйғонади. Америкаликлар орасида бу туйғуни уйғотган фильмлардан бири “Моҳир мерган” картинаси ҳисобланади. Том Круз ва Вал Килмер иштирокидаги фильм туфайли АҚШ ҳарбий-денгиз кучлари таркибига қўшилганларнинг аниқ сони маълум эмас, лекин 1986 йилда номзодларнинг 90 фоизи денгиз флотига киришдан олдин айнан шу фильмни томоша қилган.
Изоҳ (0)