Президентнинг «Айрим долзарб вирусли инфекциялар тарқалишига қарши курашиш чора-тадбирларини такомиллаштириш тўғрисида»ги қарори қабул қилинди. Ҳужжат матни ЎзАда эълон қилинди.
Қарорга кўра, 2022 йил 1 июлдан бошлаб ҳар йили республика аҳолисини вирусли гепатит Б ва C турларига скрининг текширувлари сони 1 миллион нафаргача, полимераза занжир реакцияси (ПЗР) текширувлари сони 15 минг нафаргача, вирусли гепатит C тури билан касалланган беморларни даволашни 10,5 минг нафаргача етказилади. Скрининг текширувларида вирусли гепатит C тури аниқланган беморларни даволаш жараёнида дори воситалари билан бепул таъминланади.
Касаллик юқиши хавфи юқори бўлган шахсларни, шу жумладан, қон ва унинг таркибий қисмлари билан ишловчи тиббиёт ходимларини гепатит Б инфекциясига қарши эмлаш билан тўлиқ қамраб олинади. 2022 йил 1 июндан бошлаб қон билан бевосита ишлаётган давлат тиббиёт муассасалари ходимларини гепатит Б касаллигига қарши бепул эмлаш амалиёти жорий этилади.
2022 йил 1 сентябрдан Маъмурий жавобгарлик тўғрисидаги кодекснинг 190-моддасида (фоҳишалик билан шуғулланиш) назарда тутилган ҳуқуқбузарликларни содир этган шахсларга нисбатан жавобгарликни белгилаш билан бирга уларни ўз ҳисобидан гепатитнинг Б ва C турларига скрининг текширувларидан ўтказиш тартиби жорий этилади.
ССВ муассислигида IT-Med МЧЖ томонидан жигар сурункали вирусли касалликларининг ягона электрон реестри 2022 йил 1 ноябрга қадар ишлаб чиқилади.
Инновацион ривожланиш вазирлиги ССВ билан биргаликда 1 июлдан бошлаб ҳар йили кенг тарқалган вирусли инфекциялар муаммоларининг илмий ечимини таъминлашга қаратилган лойиҳаларга танловлар асосида маблағлар ажратади.
Аввалроқ қарор билан Ўзбекистоннинг 7 та ҳудудида Қрим-Конго иситмаси билан касалланганларнинг қон плазмаси банки ташкил этилиши хабар қилинганди.
Изоҳ (0)