Миср ҳукумати томонидан Ўзбекистонга инсонпарварлик ёрдами сифатида ажратилган гепатит B га қарши дори воситалари 25 июнь куни Шарм аш-Шайхдан Тошкентга етказилди, деб хабар бермоқда “Дунё” АА.
Ўзбекистон элчихонасидан олинган маълумотга кўра, Миср Соғлиқни сақлаш вазирлиги билан олиб борилган музокаралар натижасида Ўзбекистонга инсонпарварлик ёрдами сифатида гепатит B га қарши “Entecavir” дори воситаларини ажратиш бўйича келишувга эришилди.
Умумий ҳажми 5 минг қутидан ортиқ “Entecavir” дори воситалари Ўзбекистон Соғлиқни сақлаш вазирлиги ҳузуридаги Вирусология илмий-текшириш институти томонидан шифоталаб беморларга берилади.
Таъкидланишича, Миср гепатит B ва C вирусларига қарши курашда дунё миқёсида сезиларли муваффақиятларга эришган мамлакат ҳисобланади. Миср Соғлиқни сақлаш вазирлигига кўра, мамлакат аҳолиси ушбу касалликдан бутунлай фориғ бўлган ва бу ҳақда вазир Халед Абдуғаффор 21–30 май кунлари Женевада бўлиб ўтган Жаҳон соғлиқни сақлаш ташкилотининг 76-сессиясида маълум қилди.
Халқаро ташкилот мутахассис ва экспертлари Мисрнинг ушбу йўналишдаги ютуқларини ўрганди ва жорий йилнинг июнь ойида тегишли ҳисобот эълон қилиши ҳамда гепатит C вируси батамом барҳам этилгани ҳақидаги шаҳодатнома Миср ҳукуматига тақдим этилиши кутилмоқда. Узоқ йиллар давомида ушбу касалликдан азият чеккан Миср уни енгишга муваффақ бўлган дунёдаги биринчи давлатга айланмоқда.
Миср ҳукумати мазкур ютуқларга эришиш учун “100 миллион соғлом ҳаёт” миллий дастурини ишлаб чиқиб, уни муваффақиятли амалга оширмоқда. Бунда асосий эътибор дунёнинг машҳур фармацевтика компаниялари билан яқиндан ҳамкорлик алоқаларини ўрнатиш ва кенгайтиришга қаратилди.
Бундан аввал Мисрдан Ўзбекистонга гепатит C га қарши дори воситалари саккизта партияда етказиб берилганди.
Изоҳ (0)