Соғлиқни сақлаш вазири Амрилло Иноятов АҚШ Касалликларни назорат қилиш ва олдини олиш марказларининг Марказий Осиё бўйича минтақавий дастури директори вазифасини бажарувчи Жастин Уильямс билан учрашди.
Мулоқот аввалида давлатлар ўртасида тиббиёт йўналишидаги ҳамкорлик алоқалари йилдан йилга мустаҳкамланиб бораётгани, биргаликдаги лойиҳалар юртимизда мазкур соҳани ривожлантиришга хизмат қилаётгани алоҳида қайд этилди.
Таъкидланишича, давлат раҳбари топшириғига асосан, коронавирус ҳамда бошқа юқумли инфекцияларга қарши курашиш, вакцинасия, санитария-эпидемиология ва яна қатор йўналишлар бўйича тегишли лойиҳалар самарали амалга оширилмоқда.
2023 йилда ўзаро ҳамкорлик асносида Амалий эпидемиология бўйича ўқув дастури (FEPT) орқали тиббиёт ходимларининг эпидемиологик текширувлар ўтказиш, илмий маълумотларни таҳлил қилиш ва хавфли юқумли касалликларга қарши зарур чоралар кўриш юзасидан билим ҳамда малакаларини ошириш режалаштирилган.
Ўзбекистонда COVID-19 га қарши самарали кураш тадбирлари доирасида эмлаш дастурини кучайтириш, коронавирус ва бошқа юқумли инфекцияларнинг тарқалишини камайтириш, нафас олиш хасталикларини назорат қилиш тизимини қўллаб-қувватлаш каби муҳим лойиҳалар йўлга қўйилиши кўзда тутилган.
Учрашувда, шунингдек, ўзаро ҳамкорликни янги босқичга кўтариш, жумладан, мамлакатда вирусли гепатитнинг B ва C турларини бартараф этиш бўйича Миллий ҳаракатлар режасини ишлаб чиқиш юзасидан техник ёрдам кўрсатиш, COVID-19 нинг айланма штаммларини аниқлаш, Микробларга қарши чидамлилик лойиҳасини ишга тушириш бўйича ҳам алоқаларни кенгайтиришга келишиб олинди.
Изоҳ (0)