Тошкент вилоятида президент ташаббуси билан бошланган “Яшил макон” лойиҳаси бўйича навбатдаги кўчат экиш тадбири бўлиб ўтди. Мазкур тадбирда кўриниш берган вилоят ҳокими Зоир Мирзаев вақтинча фотограф вазифасини бажариб, ҳокимлик ахборот хизмати масъулларининг кўчат экишини ҳам суратга олди.
Вилоятда давом этган “Яшил макон”нинг навбатдаги манзили Нурафшон шаҳрида жойлашган Nurafshon Bussiness City ҳудуди бўлди.
Тадбир аввалида жонлиқ сўйилиб, юрт ободлиги, вилоят фаровонлиги йўлида қуръон тиловат қилинди. Тошкент вилояти ҳокими Зоир Мирзаев бошчилигида, бошқарма ва ташкилот раҳбарлари, туман ва шаҳар ҳокимликлари мутасаддилари, нуронийлар, ёшлар, кенг жамоатчилик ҳамда оммавий ахборот воситалари вакиллари дарахт экиш жараёнларида фаол қатнашди.
Таъкидланишича, Нурафшон шаҳридаги боғ ҳудудида 25 гектар бўш ер майдони мавжуд бўлиб, ҳозирга қадар бу ерда 6780 та манзарали дарахт кўчати ўтқазилган. Яқин йиллар ичида яна 20 минг кўчат экиш режалаштирилган.
Бугунги кўчат ўтқазиш ишларида дуб, каталпа, ясин, оқ қайин, лола дарахти, қирим қарағай, чинор каби 328 та манзарали дарахт кўчатлари ўтқазилди. Маданият соҳаси ходимлари томонидан жонли ижродаги куй ва қўшиқлар жараёндаги катта-ю кичикка кўтаринки кайфият улашди, — дейди ҳокимлик ахборот хизмати раҳбари Беҳзод Қобулов.
Вилоят раҳбари Зоир Мирзаевнинг журналистларга маълумот беришича, вилоятда барча соҳа ходимлари — журналистлар, ИИБ ходимлари, прокуратура, қишлоқ хўжалиги ходимлари учун махсус боғлар ташкил этилган бўлиб, барча касб эгалари кўчат экиш ишларида фаоллик кўрсатмоқда.
Изоҳ (0)