Ҳоким ўринбосари ва етти нафар ёшлар етакчиси жазоланди: Зоир Алиқулов ишламаганларга чора кўришни бошлади

Қашқадарё вилоятининг Қарши тумани ҳокими Зоир Алиқулов вазифасига совуққонлик қилган масъулларга чора кўришни бошлади. У маҳаллалардаги етти нафар ёшлар етакчиси, ўринбосари ва туман Ободонлаштириш бошқармаси бошлиғига чора кўрди. Бу ҳақда “Дарё”га туман ҳокимлиги ахборот хизмати раҳбари Тўлқин Турдиев хабар берди. 

Таъкидланишича, Зоир Алиқулов бошчилигида “Ёшлар дафтари” платформасини юритиш масаласида танқидий-таҳлилий йиғилиш ўтказилган. Белгиланган вазифаларнинг бажарилиши ҳамда жойларда ташкил этилган ҳаракатлар самараси сарҳисоб қилинган.

Танқидий йиғилиш давомида 7 нафар ёшлар етакчисига ҳайфсан берилди. Натижалар яхшиланмаса айрим ёшлар етакчилари вазифасидан озод этилиши бўйича огоҳлантирилди. “Қовчин”, “Узумзор”, “Потрон”, “Тинчлик” ва “Ўзбекистон мустақиллиги” маҳаллаларидаги ёшлар етакчиларининг фаолияти намунали йўлга қўйилганлиги айтиб ўтилди. Ташаббускор ва фаоллик кўрсатаётган ёшлар етакчиларига моддий рағбатлантириш белгиланди, — дейди Тўлқин Турдиев. 

Масъулнинг билдиришича, туман ҳокимининг қурилиш коммуникациялар, коммунал хўжалик, экология ва кўкаламзорлаштириш масалалар бўйича ўринбосарига ҳам интизомий жазо берилган. 

Ўзига юклатилган вазифаларини лозим даражада бажармасдан масъулиятсизликка йўл қўйганлиги ва туман ҳудудларидаги ободонлаштириш ҳамда туман ҳудудида тозаликни таъминлаш вазифасини лозим даражада бажармаганлиги сабабли туман ҳокимининг қурилиш коммуникациялар, коммунал хўжалик, экология ва кўкаламзорлаштириш масалалар бўйича ўринбосари Олимжон Очиловга нисбатан Меҳнат кодексининг 312-моддасининг 1-қисми 2-бандига асосан ўртача ойлик иш ҳақининг 15 фоиз миқдорида жарима жазоси қўлланилди, — дейди у. 

Қўшимча қилинишича, туман ҳокими қарори билан Ободонлаштириш бошқармаси бошлиғи Диёр Даминовга ҳам ҳайфсан берилган. Шунингдек, Камбағалликни қисқартириш ва бандликка кўмаклашиш бўлими бошлиғининг тегишли буйруғи билан туман ҳудудларида тозаликни таъминлаш ва ўз вазифасига совуққонлик билан қараган туман Камбағалликни қисқартириш ва бандликка кўмаклашиш бўлими бош мутахассиси Отаниёз Раҳмонов ва “Бунёдкор” МФЙ раиси Аъзам Жўраевга нисбатан Меҳнат кодексининг тегишли моддаларига асосан ҳайфсан интизомий жазо чораси қўлланилган.