“Метан заправкаларда тақчиллик кузатилса, унга тенг миқдорда бозорга бензин чиқарамиз” — Жўрабек Мирзамаҳмудов

Энергетика вазири Жўрабек Мирзамаҳмудов “Дарё” нашрига берган интервьюсида жорий йилги қиш мавсумида бензин ва метан гази етарли бўладими, деган саволга жавоб берди.

Жўрабек Мирзамаҳмудовнинг айтишича, ҳозирги кунда сиқилган газ, яъни метан етказиб бериш бўйича бирон бир чеклов ўрнатилмаган.

“Баланс доирасида кунлик 15 миллион кубометргача республика бўйича заправкаларга газ етказиб бермоқдамиз. Режамизда чеклов киритиш йўқ, лекин аномал совуқ келса, қувурлардаги босим, албатта, тушади. Биз чора кўришимиз керак.

Қўшимча захиралар ишга олинган тақдирда ҳам барбир ўша истеъмолни босимларини инобатга олиб, аҳоли, ижтимоий объектлар, иссиқлик марказларини табиий газ билан таъминлаш биринчи масала. Шуни таъминлаш мақсадида метан заправкаларга қандайдир бир график, қандайдир бир газни етказиб беришни қисқартириш ёки ишлаш режимини мувофиқлаштириш орқали фаолиятини ташкил қиламиз.

Агарда буни қисқартирсак, қўшимча бензинга бўлган эҳтиёжни таъминлаш учун чоралар кўриляпти. Ўзимизда ишлаб чиқаришни кўпайтириб, ички бозорга етказиб бериш биринчи асосий вазифамиздир. Бунинг учун ички ва ташқи ресурслардан хом ашё олиб келиш режалаштирилган”, — деди вазир.

Унинг алоҳида таъкидлашича, қўшимча бензинни импорт қилиб олиб келиш бошлаб юборилган.

“Ҳозирги кунда Россиядан биринчи партия бензин етиб келди. Биржа орқали реализация қилишни бошладик. Режага асосан ноябрнинг охиригача 15 минг тонна дастлабки партияси келса, декабрнинг ойида яна 40 минг тонна олиб келинади. Буни хусусий бизнес олиб келяпти. Биз фақатгина кўмаклашдик. Буни ҳукуматлараро келишиб, ҳамма масалаларда амалий ёрдам берган ҳолда Россия компанияларидан олиб келиб, ички бозорга етказиляпти.

Биз марказлаштирилган ҳолда олиб келиб етказиб берадиган бензиндан ташқари метан заправкаларда қандайдир тақчиллик кузатилса, ўша ҳажмга тенг равишда бензинни қўшимча равишда бозорга истеъмол учун чиқарамиз”, — деди Жўрабек Мирзамаҳмудов.

Авварлоқ Жўрабек Мирзамаҳмудов Тошкент шаҳрида тарихда биринчи марта юқори кучланишли кабел ер остидан олиб ўтилганини айтиб ўтган эди.