Навоий вилоятининг Томди туманида 500 МВт қувватли шамол электр станциясини қуриш лойиҳаси доирасида биринчи шамол турбинаси қуриб битказилди. Бу ҳақда 13 июнь куни Энергетика вазирлиги томонидан ўтказилган пресс-турда маълум қилинди, дея хабар бермоқда “Дарё” мухбири.
Бирлашган Араб Амирликларининг “Masdar” компанияси томонидан барпо этилаётган мазкур йирик лойиҳа доирасида “Голдwинд” компаниясининг (Хитой Халқ Республикаси) биринчи 4,7 МВт қувватли шамол турбинаси ўрнатилди. Унинг баландлиги 97 метр, шамол парракларининг ҳар бири эса 77 метрни ташкил қилади.
Энергетика вазирлиги департаменти директори Абдуллажон Отабоевнинг таъкидлашича, мазкур лойиҳа доирасида жами 111 та шамол турбинаси ўрнатилади.
“Ушбу станциясиянинг илк қувватлари жорий йил якунида ишга туширилади ҳамда Марказий Осиёдаги энг йирик шамол электр станциясидир. Станция тўлиқ ишга туширилгач, йилига 1 млрд 800 млн кВт/соат электр энергияси ишлаб чиқарилади. Бунинг натижасида йилига 540 млн куб метр табиий газ тежалишига эришилиб, атмосферага 720 минг тонна зарарли газлар чиқишининг олди олинади”, — деди Абдуллажон Отабоев.
Унинг қўшимча қилишича, лойиҳа тўлиқ ишга тушса, ярим миллион хонадон электр энергияси билан таъминланади.
Маълумот учун, Томди туманидаги ШЭС Президентимизнинг 2020 йил декабрдаги “Навоий вилоятида қуввати 500 МВт бўлган шамол электр станциясини қуриш инвестиция лойиҳасини амалга ошириш чора-тадбирлари тўғрисида”ги қарори асосида амалга оширилмоқда.
Изоҳ (0)