Мактабгача ва мактаб таълими вазирининг биринчи ўринбосари Усмон Шарифхўжаев “Кун.уз”га берган интервьюсида хорижий донорлар асосида ишлаб чиқилиши белгиланган методикалар, дарсликлар масаласи нима бўлади, деган саволга ҳам жавоб бериб ўтди.
“Бу савол ҳам кўп кўтарилган эди, яъни улардан воз кечиладими? Улардан ҳеч ким воз кечгани йўқ, сабаби сизга бу борада мисолларни ҳам келтиришим мумкин. Бу ерда аниқ мисолларни гапирамиз. USAID ташкилоти ёрдамида ишланган инглиз тили ва информатикани Кембриж дарсликлари тизимини жорий қилиш масаласи бор, шу ташкилотдан 5 йил учун Ўзбекистон лицензия сотиб олган ва бу дарсликлар ҳозирда амалда.
Математика ёки она тили ҳақида гапирсак, бу дарсликлар янгиланди, уларни босқичма-босқич жорий қилиш масаласи қўйилганди. 4-синф дарслигини вазирлик ҳузуридаги марказ (Республика таълим маркази) яратмаган эди, йўқ эди. Халқаро тажрибалар асосида янги дарсликларни жорий қилиш бўйича тақдимотлар ўтганидан кейин, уларни жорий қилиш масаласи қўйилганидан сўнг, ўқув дастури такомиллаштирилиб, вазирлик томонидан тасдиқланди. Ҳозир вазирликнинг 280-сонли буйруғи билан ўқув дастури такомиллаштирилган ҳолда сентябрдан бошлаб 1-4-синфнинг янги дарсликлари жорий қилинди”, — деди Усмон Шарифхўжаев.
Шунингдек, вазир ўринбосари мутахассислар билан ишлаб чиқилган ва фармон, қонуний ҳужжат билан тасдиқланган дастурдан воз кечиб, янгисига эҳтиёж нима сабаб пайдо бўлди, деган саволга жавоб берган.
“Таълим сифатини назорат қилиш инспекцияси бўлганди, декабрь ойидан бошлаб тугатилиб, ярим ваколати Мактабгача ва мактаб таълими вазирлигига, қолгани олий таълимга ўтди. Улар томонидан ўтказилган халқаро тадқиқотлар андозасидаги тадқиқотлар ёки ҳақиқий халқаро тадқиқотларнинг дастлабки натижасидан келиб чиқиб дастурни такомиллаштириш ишлари амалга оширилмоқда.
Эски, янги дарсликлар масаласи фақат дарслик муаллифига қизиқ бўлиши керак, менимча. Чунки биз барибир дастур ва кўникмадаги таълим бериш жараёни ҳақида ўйлашимиз керак. Лекин агарда шу кўникмани яхшироқ, оддийроқ керак бўлса оғирроқ шаклда беришга эҳтиёж бўладиган бўлса, уни ўзгартиришга тўғри келади. Лекин дарсликнинг ичи, муаллифи ўзгариши иккиламчи бўлиши керак”, — деди Усмон Шарифхўжаев.
Изоҳ (0)