Тошкент вилояти ҳокими Зоир Мирзаев Қибрай тумани ҳокими, унинг ўринбосарлари ва ҳокимликнинг барча масъулларини вазифасидан озод қилиб, 47 нафар мансабдор ўрнига янги раҳбар тайинлангани ҳақида гапирди. Шунингдек, у бугунги кун раҳбарларининг инқирозига сабаб бўлувчи ҳолатларни ҳам санаб ўтди. 

Раҳбарнинг инқирози нимада? Биринчи инқирози — атрофидаги лаганбардорларга қулоқ сола бошганида. Иккинчи инқирози — одам ажратганида. Учинчи инқирози эса — ходимига топшириқ бериб, ижросини сўрамаганида. Топшириқ берсангизу, ижросини сўрамасангиз, сиз ходимларингиз учун энг қулай раҳбарсиз. Топшириқ бериб, назорат қилиб, жавобини сўрасангиз, ноқулай раҳбарсиз. “Эй, бу бўлмайди” дейди. “Ўзи топшириқ ёздириб, ўзи ҳижжалаб сўраб ўтиради”, дейди.

Ходимга биринчи тоифадаги раҳбар керак. Топшириқни бериб, унинг ижросини сўрамайдиган раҳбар жуда қулай-да. Айрим раҳбарлар ўтириб, тўрт-беш йил ишлаганидан сўнг раҳбарнинг кириб-чиқадиган эшиги ҳам бошқа бўлади. Олдидан чиқиб кетсангиз, беш-олтита фуқаро ўтирибди, орқадан чиқиб кетинг хўжайин, деб сизга йўл кўрсатиб, халқдан ажратиб қўядиганлар ҳам пайдо бўлади, — дейди Зоир Мирзаев бу ҳақда гапирар экан. 

Тошкент вилояти ҳокими раҳбарлар инқирози уларнинг ишидан зерикишига ҳам олиб келишини қўшимча қилган. 

Ўзингиз ҳам қуйи бўғинга ўрганишга чиқишга зерикиб қоласиз. “Ўтирган жойимдан мен биламан-ку, у муассаса нима бўлаётганини. Нима қиламан у ёққа бориб, ҳаммасини танисам, улар мени таниса, нима қиламан безовта қилиб” дейсиз. Бу лавозимдан зерикиш, — дейди вилоят ҳокими. 

Зоир Мирзаев Қибрай тажрибаси давом этишини таъкидлаган. 

Буни ислоҳот деймизми, Қибрай тажрибаси деймизми, бу ҳали давом этади, яна такрорлайман шуни, — деди вилоят раҳбари.