Мактабгача ва мактаб таълими вазирининг биринчи ўринбосари Усмон Шарифхўжаев “Кун.уз”га берган интервьюсида дарсликлардаги хатолар бўйича ҳам саволларга жавоб бериб ўтди.
Жумладан, 4-синф учун тайёрланган саводхонлик машқ дафтарида Хоразмда 13-14-асрларда Паҳлавон Маҳмуд ҳақида блиналар куйлангани ёки Кўкалдош мадрасаси Регистонда, Ичанқалъа эса Бухорода экани ёзилган. Вазир ўринбосарининг таъкидлашича, бу хатолар техник хатолар сирасига киради.
“Биз дарсликни бир нечта тилларда яратамиз. Бир тилда дарслик чиқариш осон туюлиши мумкин, лекин уни яна 6 тилда шакллантириш ўта оғир. Дизайнер битта тилда ишлайдиган одам. У фақат матнларни қўйиб чиқади. Тўғри, кейин муҳаррир ўқийди, мусаҳҳиҳ ўқийди. Лекин энг оғир жараёнлардан бири шу. Бу жараёнларда афсуски, кичик ёки катта хатолар ўтиши эҳтимоли мавжуд. Дарсликни яратиш жараёнида вазирлик ходимлари турмайди. Уни ўзини муаллифи, муҳаррири, дизайнери бор. Хато ўтиши мумкин, бундан ҳеч ким кафолатланмаган.
Бугун яна бир хатони кўрдим. Бир топишмоқ берилган, жавобини ёзиш учун катакчалар чизилган. Рус тилида топишмоқ жавобини ёзсангиз, катакчалар тўғри қўйилганини кўриш мумкин. Аммо ўзбек тилида эса битта катак етмаяпти. Бундан шунақа хулоса қилиш мумкинки, муҳаррир матнни ўқиган, текширган, аммо катакчалар сонига аҳамият қаратмаган.
Олдинги дарсликларда ҳам бунақа хатолар бўлган. Хато борлиги факт. Бунга кўз юмиб бўлмайди. Бундай хатолар дарсликларнинг кейинги нашрларида тўғриланади. Айниқса, юқорида айтилган хатоликлар машқ дафтарларида эканлигини инобатга олсак, булар кейинги ўқув йилини ўзида бартараф этилади”, — деди Усмон Шарифхўжаев.
Изоҳ (0)