Қозоғистонда мамлакатнинг биринчи президенти Нурсултон Назарбоевнинг укаси, тадбиркор Болат Назарбоев 70 ёшида вафот этди. Бу ҳақда собиқ давлат раҳбари матбуот котиби Айдос Укибайга таяниб, “РБК” хабар берди.
Амалдаги президент Қосим-Жўмарт Тўқаев ҳамдардлик билдирди. Марҳум узоқ вақтдан буён хаста бўлган. Ноябрь ойи бошида собиқ президентнинг укаси Олмаота марказий клиник шифохонасига ётқизилган. 365infо.kz портали бунга миокард инфаркти такрорланиши сабаб бўлганини ёзган.
Ўтган ёзда “Express К” портали Болат Назарбоевга ҳалқум саратони ташхиси қўйилгани ҳақида маълум қилган.
Болат Назарбоев 1953 йил 23 мартда Олмаота вилоятининг Шамалган қишлоғида туғилган. Олий юридик маълумотга эга бўлиб, 1989 йилдан тадбиркорлик билан шуғулланган. 1992 йилдан 1997 йилгача Қозоғистоннинг йирик қишлоқ хўжалиги масъулияти чекланган жамияти “Инкар Агро” вице-президенти бўлган. 1997 йилдан бери у БН Инвест молиявий-саноат холдингига раҳбарлик қилган.
Охирги икки йил ичида Назарбоев исми турли активларни хусусийлаштириш натижалари кўриб чиқилган кўплаб суд ишларида пайдо бўлган. Февраль бошида Қозоғистон ҳукумати Болат Назарбоев ширкатларига тегишли 299 гектар ерни тортиб олган. Amanat партияси қошидаги Давлат бошқарувини ривожлантириш ва коррупцияга қарши кураш бўйича жамоат кенгаши раиси Ерлан Саировнинг сўзларига кўра, Остона, Олмаота, Талгар, Каскелен ва Туркистон вилоятидаги участкалар “шубҳали шароитда” қўлга киритилган.
Изоҳ (0)