Қозоғистон Ташқи ишлар вазирлиги Ғазо секторидан фуқароларни эвакуация қилиш бошланганини маълум қилди. Бу ҳақда Tengrinews хабар берди.
Ташқи ишлар вазирлиги расмий вакили Айбек Смадияровга кўра, 13 ноябрь куни 44 кишидан иборат биринчи гуруҳ эвакуация қилиниши режалаштирилган.
“Ушбу гуруҳга Қозоғистоннинг 40 нафар фуқароси ва 4 нафар хорижлик, уларнинг оила аъзолари киради. Бугунги кунда Рафаҳ назорат-ўтказиш пункти орқали жами 594 киши, жумладан, 44 нафар фуқаромиз ўтиши режалаштирилган”, — деди у.
Таъкидланишича, эвакуация қилиниши режалаштирилганлар орасида Қозоғистондан ташқари яна 9 давлат вакиллари ҳам бор. Булар Марокаш, Иордания, Россия, Испания, Швеция, Перу, Нидерландия, Буюк Британия ва Швециядир.
Эвакуация Ғазо сектори ва Миср ўртасида жойлашган Рафаҳ назорат пункти орқали амалга оширилади. Қозоғистонликлар назорат-ўтказиш пунктидан ўтиб, қуруқлик орқали Қоҳирага етказилади ва меҳмонхонага жойлаштирилади. Керакли ҳужжатлар текширилгандан сўнг, улар Қозоғистонга жўнатилади.
“Қозоғистон дипломатлари аллақачон Қоҳирага жўнаб кетган. Улар барча назорат-ўтказиш пунктларидан ўтиб, Рафаҳга яқинлашмоқда. Бир соат ичида улар у ерга етиб бориши керак. Улар етиб бориши билан Миср расмийлари, Ғазо сектори ҳукумат вакиллари билан биргаликда барча ҳужжатларни текширишни бошлайди. Фуқароларимизни аста-секин олиб чиқиб кетамиз”, — дея хулоса қилди ТИВ расмийси.
Изоҳ (0)