Qozog‘iston AQSH kompaniyalarining AES qurish bo‘yicha takliflarini ko‘rib chiqmaydi

Qozog‘iston AQSH kompaniyalarining respublikadagi birinchi atom elektr stansiyasini qurish bo‘yicha takliflarini keyinga qoldirdi.

Bu haqda Ust-Kamenogorskda atom elektr stansiyalari masalasiga bag‘ishlangan ochiq eshituvda “Qozog‘iston atom elektr stansiyalari” kompaniyasi bosh direktori Timur Jantikin ma’lum qildi.

“Qo‘shma Shtatlar kichik modulli reaktorlar asosidagi ikkita loyihani taklif qildi. Biz ularni ko‘rib chiqishni hozircha keyinga qoldirdik, chunki ular uchun ishlaydigan atom elektr stansiyalari yo‘q va bu turli xavflarni keltirib chiqarishi mumkin”, — dedi Jantikin.

 

 

Qozog‘iston prezidenti Qosim-Jo‘mart To‘qayev 1-sentyabr kuni mamlakat xalqiga qilgan murojaatnomasida atom elektr stansiyasini qurish masalasini umumxalq referendumiga qo‘yishni taklif qilgan edi. Uning fikricha, bu borada jamoatchilik muhokamalarini davom ettirish zarur. Referendum sanasi jamoatchilik bilan maslahatlashilganidan keyin belgilanadi.

Hukumat hozirda yadro texnologiyalarining bir nechta potensial yetkazib beruvchilarini ko‘rib chiqmoqda: Xitoyning CNNC kompaniyasi, Janubiy Koreyaning KHNP, Fransiyaning EDF va Rossiyaning Rosatom davlat korporatsiyasi.