“Толибон” Энергетика ва сув вазирлиги маслаҳатчиси Фаруқ Аъзам Афғонистон суви бошқарилса, қўшни мамлакатлар сувга муҳтож бўлишини айтди. Бу ҳақда RТА Dari нашри хабар берди.
Аъзам Афғонистоннинг иқтисодий ривожланишига бағишланган анжуманда шундай баёнотлар берган. У Афғонистонда етарли сув борлиги, агар у бошқарилса, қўшни давлатлар унга муҳтож бўлишини айтган. Вазир маслаҳатчиси хусусий секторга сув хўжалигида ишлашга рухсат беришни сўраган.
Сўнгги йилларда Афғонистоннинг сув тўғонлари қуриши қўшни давлатлар, хусусан, Эронда ҳам хавотир ва норозиликларга сабаб бўлмоқда. Бу йил Эрон ва “Толибон” ўртасидаги сув муаммоси бир-бирини огоҳлантириш даражасига етди. Эрон Афғонистонни Ҳилманд дарёси суви тақсимотини чеклаганликда айблаб, “Толибон” Кажаки тўғони сувининг Эронга киришига тўсқинлик қилаётганини билдирди.
“Толибон”га кўра, қурғоқчилик туфайли Ҳилманд дарёсидаги сув Эронга етиб бормайди.
Эрон делегациясининг Кажаки тўғонига ташрифидан сўнг, томонлар ўртасидаги кескинлик пасайган бўлса-да, ташриф натижалари очиқланмаган.
Айни дамда Эрон ҳукумати мамлакатнинг сув ҳуқуқларига алоҳида эътибор қаратишини таъкидламоқда. Эрон ташқи ишлар вазири Ҳусайн Амир Абдуллаҳиён яқинда Теҳронда “Толибон” бош вазирининг иқтисодий масалалар бўйича ўринбосари Абдул Ғани Бародар билан учрашувда сув муаммосининг нозиклиги ва унинг атроф-муҳит ва одамлар ҳаётига бевосита таъсири ҳақида гапирди. У Афғонистон ҳукумати Эроннинг сув ҳуқуқларини таъминлашга эътибор қаратиши лозимлигини айтган.
Бундан ташқари, Қўштепа канали лойиҳаси Амударёнинг сув ресурсларини бошқариш соҳасидаги йирик лойиҳалардан биридир, у ҳозирда Афғонистон шимолида амалга оширилмоқда.
“Толибон” каналнинг биринчи босқичи ишга туширилганини айтмоқда, аммо Марказий Осиё давлатлари бу лойиҳадан хавотирда.
Ўзбекистон президенти Шавкат Мирзияев яқинда “Толибон” томонидан Қўштепа канали қурилиши Марказий Осиёдаги сув режими ва мувозанатини ўзгартиришини айтганди. “Толибон” эса Ўзбекистон Қўштепа каналидан зарар кўрмаслигига ваъда берган.
Изоҳ (0)