“Толибон” Ўзбекистон президентининг Туркий давлатлар ташкилоти саммитидаги Афғонистон бўйича нутқини олқишлади. Бу ҳақда “Толибон” матбуот котиби Забиуллоҳ Мужоҳид хабар берди.
Мужоҳиднинг таъкидлашича, Афғонистонда тинчлик ва барқарорликни ўрнатишда минтақа давлатлари ҳамкорлиги муҳим аҳамиятга эга. У тинчлик ва барқарорлик учун қўшни давлатларнинг Ислом Амирлиги билан мустаҳкам дипломатик алоқалари зарурлигини айтди.
“Минтақа Афғонистонга ҳозирги барқарорликда ёрдам бериши ва ҳамкорлик қилиши, яратилган ёки ўйлаб топилган муаммоларнинг олдини олиши керак. Иккинчидан, Афғонистон Ислом Амирлиги билан мустаҳкам дипломатик алоқаларни тиклаши керак”, — деди Мужоҳид.
Аввалроқ Ўзбекистон президенти Шавкат Мирзиёев Туркий давлатлар ташкилоти йиғилишида Афғонистондаги тинчлик ва барқарорликни минтақада тинчлик ўрнатишда муҳимлигини айтганди.
“Афғон халқига инсонпарварлик ёрдами кўрсатишни сусайтирмаслик, бу юртдаги ўткир ижтимоий муаммоларни ҳал этишга қаратилган аниқ механизмларни ишлаб чиқишга чақирамиз. Бизга минтақавий шериклик ва барча қўшнилари билан иқтисодий ҳамкорлик жараёнларида фаол иштирок этадиган, тинч ва барқарор Афғонистон керак”, — деган Мирзиёев.
Президентнинг таъкидлашича, трансафғон темирйўлини барпо этиш ташаббуси айнан мана шу мақсадга хизмат қилади.
“Ўзбекистон афғон халқига бундан буён ҳам зарур ёрдамни бериб боради. Термиздаги логистика хаби орқали гуманитар кўмак кўрсатишни, Таълим марказида эса афғон фуқароларини ўқитишни фаол давом эттирамиз”, — деб таъкидлаган давлат раҳбари.
Изоҳ (0)