Ўзбекистондаги бешта археологик ёдгорлик очиқ осмон остидаги музей ва сайёҳлик объектларига айланади. Бу ҳақда Маданий мерос агентлиги матбуот хизмати хабар берди.
Қайд этилишича, Маданий мерос агентлиги ходимлари Фанлар академияси, Қорақалпоғистон Вазирлар Кенгаши, вилоятлар ва Тошкент шаҳар ҳокимликлари ҳамда археология соҳаси мутахассислари билан ҳамкорликда археология ёдгорликларини консервациялаш, уларда очиқ осмон остидаги музейлар ташкил этиш бўйича илмий-тадқиқот ишларини олиб бормоқда.
Ҳудудий реставрация марказлари томонидан Тошкентдаги “Чилонзор Оқтепа”, Сурхондарё вилоятидаги “Далверзинтепа”, Андижон вилоятидаги “Мингтепа”, Самарқанд вилоятидаги “Шероз қалъа”, Элликқалъа туманидаги “Қўйқирилган қалъа” археологик ёдгорликларида қатор ишлар амалга оширилган.
“Шероз қалъа” археологик ёдгорликларини музейлаштириш учун Маданий мерос агентлиги томонидан 1 миллиард сўм, “Далверзинтепа” 800 миллион сўм, “Чилонзор Оқтепа”га 500 миллион сўм маблағ ажратилган.
“Объектларнинг конвервацияланадиган қисмлари металл конструкциялар билан қопланган ёки панжара билан ўралган бўлади. Кузатув майдончалари қуриш, ташриф буюрувчилар учун ўриндиқлар жойлаштириш, йўлакчалар ётқизиш, лампалар ўрнатиш ҳам режалаштирилган”, — дейилади хабарда.
Бундан олдин Сурхондарёда археология ёдгорлиги фуқарога боғдорчилик учун бериб юборилгани аниқлангани, Бухорода 5 та археология ёдгорлигига 291 млрд сўм зарар етказилгани, Сурхондарёда археологик ёдгорликлар тупроғидан молхона, ҳожатхона қурилгани тўғрисида хабар берилганди.
Изоҳ (0)