Олий Мажлис Сенатининг қирқ олтинчи ялпи мажлисида Олий Мажлиснинг бола ҳуқуқлари бўйича вакилини (болалар омбудсманини) сайлаш тўғрисидаги масаласи кўриб чиқилди. Бу ҳақда парламент юқори палатаси матбуот хизмати хабар берди.
Қайд этилишича, Сенат томонидан Сурайё Раҳмоновани Олий Мажлиснинг бола ҳуқуқлари бўйича вакили (болалар омбудсмани) лавозимига сайлаш тўғрисида қарор қабул қилинган.
Сурайё Раҳмонова 2000 йилда Тошкент давлат юридик университетида бакалавр даражасини, 2002 йилда эса магистр дажарасини олган. Доцент (2015 йил), юридик фанлар доктори (2018 йил), профессор.
Сурайё Раҳмонова 2018 йилдан 2019 йил июлга қадар Бош прокуратуранинг Жамоатчилик билан алоқалар ва ҳуқуқий маълумотлар бўлими бошлиғи лавозимида ишлаган. Шундан кейин у янги лавозимга — Ахборот ва оммавий коммуникациялар агентлигининг Ахборот хизматлари фаолиятини ташкил қилиш ва мувофиқлаштириш бошқармаси Давлат бошқаруви органлари ахборот хизматлари фаолиятини ташкил этиш ва мувофиқлаштириш бўлими бошлиғи этиб тайинланганди.
2023 йил сентябрь ўрталарида Олий Мажлиснинг бола ҳуқуқлари бўйича вакили Алия Юнусова истеъфога чиқишини эълон қилган эди. У бола ҳуқуқ ва манфаатларини таъминлаш, ёш авлоднинг ҳар томонлама баркамол вояга етиши, оналик ва болаликни муҳофаза қилиш масалаларига алоҳида эътибор қаратаётгани учун президент Шавкат Мирзиёевга миннатдорчилик билдирган.
Изоҳ (0)