Таниқли хонанда ва актриса Женнифер Лопес турмуш ўртоғи Бен Аффлек билан Лос-Анжелесдан янги уй сотиб олишга қарор қилганларидан кейин Лопес Бел-Эйрда жойлашган уйини сотувга қўйди. 1300 квадрат метрлик жойни эгаллаган ҳашаматли уй 35 миллион АҚШ долларига сотилди.
Женнифер Лопес бу уйни 2016 йилда 28 миллион АҚШ доллари эвазига актриса Сила Уорд ва унинг турмуш ўртоғи, тадбиркор Говард Шермандан харид қилган эди.
Кўчмас мулкнинг ёпиқ ҳовлиси 1300 квадрат метрлик жойни эгаллаган. Уйда 9 та ётоқхона мавжуд, ички интерер француз услубига хос элементлар билан безатилган.
Уйда, шунингдек, кинотеатр, бар, ёғоч панеллар билан қопланган кутубхона ҳам бор. Ҳовли ҳудудида эса меҳмонлар учун коттеж, бассейн, голф майдончаси, барбекю ҳудуди, 100 кишилик очиқ амфитеатр, органик томорқа ва ҳаттоки қумли пляж, махсус душ ҳамда кичик кўл ҳам жойлашган.
Уй таниқли меъмор Семюел Маркс томонидан лойиҳалаштирилган бўлиб, биноларнинг тошдан ишланган ташқи қисмида француз қишлоқларига хос элементларни кўриш мумкин. Асосий қаватдан шифтлари баланд меҳмонхона, бар, камин ва ҳовлидаги айвонга чиқиш йўли жой олган. Ётоқхоналарнинг бир қисми, шунингдек, барча турдаги замонавий техникалар билан жиҳозланган ва нонушта қилиш учун махсус ҳудуд ажратилган бош ошхона ҳам асосий қаватда жойлашган.
Пастки қаватдаги 30 кишилик кинозал дўстлар даврасидаги базмлар учун мукаммал даражада мос келади. Уйнинг иккинчи қаватида эса кутубхона, ишлаш учун махсус хона, гардероб, уқалаш хонаси ва меҳмонлар учун ётоқхона жойлашган.
Изоҳ (0)