Иқтисодиёт ва молия вазирлиги “2023-2027 йилларда Ўзбекистон Республикаси давлат харидлари тизимини янада ривожлантириш ва такомиллаштириш стратегиясини тасдиқлаш тўғрисида”ги президенти қарори лойиҳасини муҳокамага қўйди.
Ҳужжат билан давлат харидлари соҳасини тартибга солишнинг асосий мақсадларига эришиш, давлат харидларини ташкил этиш ва ўтказиш тизимини, шу жумладан, электрон тизимини янада ривожлантириш, унинг самарадорлиги ва очиқлигини ошириш, “яшил” давлат харидларини амалга ошириш бўйича давлат сиёсатини янги босқичга олиб чиқиш мақсадида:
2023-2027 йилларда Ўзбекистонда давлат харидлари тизимини янада ривожлантириш ва такомиллаштириш стратегияси мувофиқ тасдиқланади.
Стратегиянинг устувор йўналишлари этиб қуйидагилар белгиланмоқда:
- давлат харидлари соҳасида норматив-ҳуқуқий ҳужжатлар, ўқув-методик, илмий ва ахборот-таҳлилий базани такомиллаштириш ҳамда тизимлаштириш;
- барқарор давлат харидларини, жумладан, “яшил” давлат харидларини амалга ошириш;
- давлат харидлари соҳасида ахборот-коммуникация технологияларидан фойдаланиш кўламини янада кенгайтириш;
- давлат харидлари жараёнларида иштирок этувчи тарафларнинг шартнома мажбуриятларига риоя этилишини мониторинг, таҳлил ва назорат қилишнинг рақамли технологияларга асосланган комплекс тизимини жорий этиш;
- давлат харидлари жараёнларида иштирок этувчи тадбиркорлик субъектларининг кўламини янада кенгайтириш;
- давлат харидлари соҳасидаги шикоятларни кўриб чиқиш механизмларини янада такомиллаштириш;
- давлат харидлари соҳасида рақамли технологиялар ёрдамида коррупциявий хавф-хатарларни аниқлаш ва олдини олишга қаратилган замонавий механизмларни амалиётга жорий этиш;
- харид қилиш тартиб-таомилларини ташкил этиш ва ўтказишга масъул шахсларни мунтазам ўқитиш ва малакасини ошириш.
Иқтисодиёт ва молия вазирлиги:
- барқарор давлат харидларини, шу жумладан “яшил” давлат харидларини амалга ошириш бўйича намунавий йўриқномани ишлаб чиқади ва амалиётга босқичма-босқич жорий қилиш чораларини кўради;
- тасдиқланган йўриқномага мувофиқ барқарор давлат харидлари бўйича ҳаракатлар режасини ишлаб чиқади ва тасдиқлатади;
- “яшил” давлат харидларини амалга ошириш доирасида давлат буюртмачиларининг салоҳиятини тизимли тарзда ошириб боради;
- манфаатдор вазирлик ва идоралар билан биргаликда мазкур қарор билан тасдиқланган комплекс чора-тадбирларнинг ўз вақтида ва сифатли амалга оширилишини таъминлайди.
Аввалроқ Ўзбекистонда бир ойда давлат харидларини амалга оширишда 15 та қонунбузилиш ҳолатига йўл қўйилгани аниқлангани тўғрисида хабар берилганди. Шунингдек, Андижонда 2022 йилда салкам 72 миллиард сўмлик бюджет маблағлари ноқонуний ўзлаштирилганлиги аниқланган эди.
Изоҳ (0)