Iqtisodiyot va moliya vazirligi “2023-2027-yillarda O‘zbekiston Respublikasi davlat xaridlari tizimini yanada rivojlantirish va takomillashtirish strategiyasini tasdiqlash to‘g‘risida”gi prezidenti qarori loyihasini muhokamaga qo‘ydi.
Hujjat bilan davlat xaridlari sohasini tartibga solishning asosiy maqsadlariga erishish, davlat xaridlarini tashkil etish va o‘tkazish tizimini, shu jumladan, elektron tizimini yanada rivojlantirish, uning samaradorligi va ochiqligini oshirish, “yashil” davlat xaridlarini amalga oshirish bo‘yicha davlat siyosatini yangi bosqichga olib chiqish maqsadida:
2023-2027-yillarda O‘zbekistonda davlat xaridlari tizimini yanada rivojlantirish va takomillashtirish strategiyasi muvofiq tasdiqlanadi.
Strategiyaning ustuvor yo‘nalishlari etib quyidagilar belgilanmoqda:
- davlat xaridlari sohasida normativ-huquqiy hujjatlar, o‘quv-metodik, ilmiy va axborot-tahliliy bazani takomillashtirish hamda tizimlashtirish;
- barqaror davlat xaridlarini, jumladan, “yashil” davlat xaridlarini amalga oshirish;
- davlat xaridlari sohasida axborot-kommunikatsiya texnologiyalaridan foydalanish ko‘lamini yanada kengaytirish;
- davlat xaridlari jarayonlarida ishtirok etuvchi taraflarning shartnoma majburiyatlariga rioya etilishini monitoring, tahlil va nazorat qilishning raqamli texnologiyalarga asoslangan kompleks tizimini joriy etish;
- davlat xaridlari jarayonlarida ishtirok etuvchi tadbirkorlik subyektlarining ko‘lamini yanada kengaytirish;
- davlat xaridlari sohasidagi shikoyatlarni ko‘rib chiqish mexanizmlarini yanada takomillashtirish;
- davlat xaridlari sohasida raqamli texnologiyalar yordamida korrupsiyaviy xavf-xatarlarni aniqlash va oldini olishga qaratilgan zamonaviy mexanizmlarni amaliyotga joriy etish;
- xarid qilish tartib-taomillarini tashkil etish va o‘tkazishga masʼul shaxslarni muntazam o‘qitish va malakasini oshirish.
Iqtisodiyot va moliya vazirligi:
- barqaror davlat xaridlarini, shu jumladan “yashil” davlat xaridlarini amalga oshirish bo‘yicha namunaviy yo‘riqnomani ishlab chiqadi va amaliyotga bosqichma-bosqich joriy qilish choralarini ko‘radi;
- tasdiqlangan yo‘riqnomaga muvofiq barqaror davlat xaridlari bo‘yicha harakatlar rejasini ishlab chiqadi va tasdiqlatadi;
- “yashil” davlat xaridlarini amalga oshirish doirasida davlat buyurtmachilarining salohiyatini tizimli tarzda oshirib boradi;
- manfaatdor vazirlik va idoralar bilan birgalikda mazkur qaror bilan tasdiqlangan kompleks chora-tadbirlarning o‘z vaqtida va sifatli amalga oshirilishini taʼminlaydi.
Avvalroq O‘zbekistonda bir oyda davlat xaridlarini amalga oshirishda 15 ta qonunbuzilish holatiga yo‘l qo‘yilgani aniqlangani to‘g‘risida xabar berilgandi. Shuningdek, Andijonda 2022-yilda salkam 72 milliard so‘mlik budjet mablag‘lari noqonuniy o‘zlashtirilganligi aniqlangan edi.
Izoh (0)