Ўзбекистон истеъмолчилар ҳуқуқларини ҳимоя қилиш жамиятлари федерациясига 2023 йилнинг тўққиз ойи давомида фуқаро (истеъмолчи)лардан жами 11 минг 444 та мурожаат келиб тушган. Бу ҳақда федерация матбуот хизмати хабар берди.
Мазкур ариза ва шикоятларнинг 10 007 таси, яъни, 87,4 фоизи ижобий ҳал этилиши натижасида, истеъмолчилар фойдасига жами 46 миллард 832 миллион сўм етказилган зарар қайта ҳисоб-китоб қилиб берилган.
Федерация ва унинг ҳудудий ижро органлари томонидан келиб тушган 124 та мурожаат асосида истеъмолчиларнинг манфаатларини кўзлаб суд органларига даъво аризалари киритилиши ва ижобий ҳал этилиши натижасида, 8 миллард 880 миллион сўм моддий ва маънавий зарарлар истеъмолчилар фойдасига қайта ҳисоб-китоб қилинган.
Бундан ташқари, фуқаролардан тушган жами 33 та мурожаат юзасидан назорат органларига тегишли мурожаатлар йўлланиб, ижобий ҳал этилиши натижасида, истеъмолчилар фойдасига 156,5 миллион сўм маблағ қайта ҳисоб-китоб қилинишига эришилган.
Истеъмолчилардан келиб тушган мурожаатларнинг
- 4135 таси (36,1 фоиз) – савдо;
- 1427 таси (12,5 фоиз) – газ таъминоти;
- 1343 таси (11,7 фоиз) – электр таъминоти;
- 517 таси (4,5 фоиз) – сув таъминоти;
- 938 таси (8,2 фоиз) – коммунал хизмат;
- 251 таси (2,2 фоиз) – соғлиқни сақлаш;
- 706 таси (6,2 фоиз) – хизмат кўрсатиш (сервис);
- 252 таси (2,2 фоиз) – транспорт;
- 274 таси (2,4 фоиз) – алоқа (ва интернет);
- 1601 таси (14 фоиз) эса бошқа соҳаларга тўғри келган.
Аввалроқ Ўзбекистонда 2023 йилда 75 мингдан зиёд ногиронлиги бўлган шахсларнинг пенсиялари қайта ҳисоб-китоб қилиниб 300 минг сўмгача ошгани тўғрисида хабар берилганди.
Изоҳ (0)