Исроилнинг Сдерот шаҳри мэри аҳолини эвакуация қилишга чақирди

Исроилнинг Сдерот шаҳри мэри Алон Давиди бош вазир Бенямин Нетаняхуга мурожаат қилиб, шаҳар аҳолисини эвакуация қилишни сўради.

Мазкур ҳудуд 12-октябр, пайшанба куни эрталаб Фаластиннинг ҲАМАС ҳаракати томонидан ўққа тутилган ва бир неча киши яраланган.

“Ҳукумат раҳбари, армиямиз ўз жанговар топшириқларини бехатар бажара олиши учун шаҳарнг барча аҳолиси Сдеротдан олиб чиқилиши керак... Одамлар бу ерда 20 йилдан бери яшаб келмоқда, улар эвакуация қилинишга лойиқ”, — деди Давиди ўз баёнотида.

Сдерот — Исроил жанубидаги кичик шаҳар, Ашкелондан 15 км узоқликда жойлашган. Аҳолиси 30 минг кишидан ошади. 9-октябрь куни Исроил ҳарбийлари Сдеротда қуролланган шахсларни аниқлаш учун “тозалаш” операциясини ўтказди. Ўшанда аҳолини эвакуация қилиш ҳақида эълон қилинмаганди.

Пайшанба куни эрталаб Фаластин кучлари тўққиз соатлик танаффусдан сўнг Исроил жанубини ўққа тута бошлади. Исроил ва ҲАМАС ўртасидаги уруш 7-октябрдан бери давом этмоқда. Ҳар икки томондан минглаб одамлар ҳалок бўлгани хабар қилинмоқда.