Миср фаластинлик қочқинларга чегарасини очишдан бош тортди — Reuters

Миср Ғазо секторидан келаётган қочқинлар учун хавфсиз йўлак очишдан бош тортди, деб хабар бермоқда Reuters.

Мамлакат расмийлари АҚШ ва бошқа давлатлар билан анклавга гуманитар ёрдам етказиш масаласини муҳокама қилаётган бўлса-да, қочқинлар учун йўлак очишдан бош тортган. Бу ҳақда Reutersъга Миср хавфсизлик хизматининг юқори мартабали амалдорлари маълум қилди.

Фаластин—Исроил можароларида тез-тез воситачи бўлиб келган Миср иккала томон ҳам ўз чегараларида қолиши кераклигини таъкидламоқда. Миср расмийларига кўра, бу фаластинликлар учун давлатчилик ҳуқуқини ҳимоя қилишнинг ягона йўли.

АҚШ Миллий хавфсизлик бўйича маслаҳатчиси Жейк Салливан Миср ва Исроил ҳукумати билан музокаралар ўтказилаётгани ҳақида гапирганди. 

“Бу маслаҳатлашувлар давом этмоқда”, — деди АҚШ Давлат котиби Энтони Блинкен.

Ғазо сектори жанубда Миср билан чегарадош. Ҳозир секторда гуманитар фалокат рўй бермоқда, чунки шифохоналар тўлиб-тошган, куни кеча ягона электр станцияси ишлашдан тўхтади. Энергия етишмаслиги туфайли маҳаллий аҳоли сувдан ҳам маҳрум бўлди.