Россиянинг Украина билан чегарадаги Белгород вилоятида 12-октябрга ўтар кечаси ҳаво ҳужумидан мудофаа тизимлари учувчисиз учоқни уриб туширди. Дрон қолдиқлари хусусий турар жой биносига қулаб, ёнғин чиқди, деб хабар бермоқда вилоят раҳбари Вячеслав Гладков. Ёнғин оқибатида уч киши — бир эркак, бир аёл ва бола ҳалок бўлган.
Бундан ташқари, Гладков ўзининг Telegram каналида икки киши жабрланганини ёзган — оғир даражада куйган эркак комада, оёқлари синган ва мияси чайқалган аёлнинг аҳволини шифокорлар оғир деб баҳоламоқда.
Дрон бўлаклари келиб тушиши оқибатида битта турар жой биноси тўлиқ вайрон бўлган, яна иккитаси қисман зарар кўрган ва учта автомобилга ҳам шикаст етган.
Белгородда содир бўлган воқеа туфайли “бир нечта тадбирлар жадвали ўзгартирилди”, деди Гладков.
“Умид қиламанки, ота-оналар ва болалар тушунишади, чунки қайта режалаштириш зарурати бор”, — дея қўшимча қилди у.
Россиянинг Украина билан чегарадош бошқа вилоятлари каби Белгород вилояти расмийлари чегара ҳудудлари ўққа тутилаётгани ва дрон ҳужумлари ҳақида мунтазам хабар бериб келади. Дронлар чегарадан юзлаб километр узоқликдаги нишонларга ҳам зарба бермоқда, хусусан, улар бир неча бор Москва марказига учиб келган.
Изоҳ (0)