Maxar Technologies компанияси сунъий йўлдошдан олинган суратларда Исроилнинг Ғазо секторига берган зарбалари оқибатларини кўрсатди.
7-октябр куни ҲАМАС Исроил ҳудудига йирик ракета ҳужуми бошлаб, мамлакатнинг Ғазо билан чегара ҳудудларига кириб борди, 100 дан ортиқ одамларни, жумладан хорижликларни асирга олди. Исроил ҲАМАС гуруҳининг ҳужумига жавобан Ғазо секторини бомбардимон қилмоқда.
10-октябрга келиб, Исроил томонида ҳалок бўлганлар сони 1,2 минг кишидан ошди, 3 мингга яқин киши жароҳатланган. Ғазо секторида эса жами 950 киши ҳалок бўлди, 5 мингга яқин киши жароҳат олди.
Шу куни Исроил мудофаа вазири Ёав Галант Исроил армияси “вазиятни назоратга олгани” ва “тўлиқ миқёсли ҳужумга ўтаётганини” айтди.
“ҲАМАС Ғазо секторида ўзгариш бўлишини хоҳлади ва у жангарилар ўйлаганидан 180 даражага ўзгаради. Улар бу дақиқадан пушаймон бўлишади. Ғазо ҳеч қачон аввалги ҳолига қайтмайди. Ким бош олишга, аёлларни ва Ҳолокостдан омон қолганларни ўлдиришга келса, биз уни йўқ қиламиз”, — деди Галант.
Фаластин бош вазири Муҳаммад Штае ҲАМАС ва Исроил ўртасидаги зиддиятнинг кучайиши сабабли Ғазо сектори инсонпарварлик фалокатига дуч келаётгани ҳақида огоҳлантирди.
Изоҳ (0)