БМТнинг Гаагадаги Халқаро суди Арманистоннинг Озарбайжонга қарши Қорабоғдаги арман аҳолисига нисбатан камситишнинг олдини олиш бўйича вақтинчалик чоралар кўриш талаб қилинган даъвоси бўйича очиқ эшитувлар ўтказишни белгилади. Суд мажлиси 12-октябр куни бўлиб ўтади.
Арманистоннинг даъвоси 29-сентябр куни Халқаро судга тақдим этилган. Унда Ереван Бокудан барчага Қорабоғдан чиқиб кетиш имкониятини беришни, БМТ ва Қизил Хоч вакилларининг минтақадаги арман аҳолиси билан мулоқотини таъминлашни ва коммунал тизимни тиклашга ёрдам беришни талаб қилган.
Арманистон, шунингдек, Озарбайжондан илгари тан олинмаган ва тугатилган Қорабоғ Республикаси ҳукумати томонидан берилган фуқаролик ҳолати далолатномалари тўғрисидаги гувоҳномаларни ҳақиқий деб тан олишини ҳамда Қорабоғнинг амалдаги ёки собиқ сиёсий вакиллари ёки ҳарбий хизматчиларига нисбатан жазо чораларини кўрмаслигини сўрамоқда.
Бундан ташқари, арман томони Озарбайжон ҳарбийлари ва хавфсизлик кучларидан Қорабоғдаги тинч аҳоли пунктларини тарк этишни, минтақадаги арман маданий мероси обидаларини бузиш тақиқланишини талаб қилмоқда.
Озарбайжон 19—20-сентябр кунлари “аксилтеррор чоралари” натижасида Қорабоғ ҳудуди устидан назоратни тўлиқ тиклади. 1990 йилларнинг бошидан бери мавжуд бўлган тан олинмаган Тоғли Қорабоғ Республикасининг ҳокимияти ўз-ўзини тарқатиб юборди. Икки ҳафтадан камроқ вақт ичида у ерда яшовчи 120 минг этник армандан 100 минги Қорабоғни тарк этди.
Изоҳ (0)