BMTning Gaagadagi Xalqaro sudi Armanistonning Ozarbayjonga qarshi Qorabog‘dagi arman aholisiga nisbatan kamsitishning oldini olish bo‘yicha vaqtinchalik choralar ko‘rish talab qilingan da’vosi bo‘yicha ochiq eshituvlar o‘tkazishni belgiladi. Sud majlisi 12-oktyabr kuni bo‘lib o‘tadi.
Armanistonning da’vosi 29-sentyabr kuni Xalqaro sudga taqdim etilgan. Unda Yerevan Bokudan barchaga Qorabog‘dan chiqib ketish imkoniyatini berishni, BMT va Qizil Xoch vakillarining mintaqadagi arman aholisi bilan muloqotini ta’minlashni va kommunal tizimni tiklashga yordam berishni talab qilgan.
Armaniston, shuningdek, Ozarbayjondan ilgari tan olinmagan va tugatilgan Qorabog‘ Respublikasi hukumati tomonidan berilgan fuqarolik holati dalolatnomalari to‘g‘risidagi guvohnomalarni haqiqiy deb tan olishini hamda Qorabog‘ning amaldagi yoki sobiq siyosiy vakillari yoki harbiy xizmatchilariga nisbatan jazo choralarini ko‘rmasligini so‘ramoqda.
Bundan tashqari, arman tomoni Ozarbayjon harbiylari va xavfsizlik kuchlaridan Qorabog‘dagi tinch aholi punktlarini tark etishni, mintaqadagi arman madaniy merosi obidalarini buzish taqiqlanishini talab qilmoqda.
Ozarbayjon 19—20-sentyabr kunlari “aksilterror choralari” natijasida Qorabog‘ hududi ustidan nazoratni to‘liq tikladi. 1990-yillarning boshidan beri mavjud bo‘lgan tan olinmagan Tog‘li Qorabog‘ Respublikasining hokimiyati o‘z-o‘zini tarqatib yubordi. Ikki haftadan kamroq vaqt ichida u yerda yashovchi 120 ming etnik armandan 100 mingi Qorabog‘ni tark etdi.
Izoh (0)