Озарбайжон давлат хавфсизлик хизмати ходимлари тан олинмаган Тоғли Қорабоғ Республикасининг собиқ президентлари Аркадий Гукасян ва Бако Саакянни қўлга олди. Бу ҳақда APА хабар берди.

Улар билан бирга республика парламентининг собиқ спикери Давид Ишханян ҳам ҳибсга олинган. Айбланувчилар уларга нисбатан қўзғатилган жиноят ишлари доирасида Бокуга олиб келинган. Тергов қайси моддалар бўйича олиб борилаётганига аниқлик киритилмаган.

Аркадий Гукасян тан олинмаган Тоғли Қорабоғ Республикасининг иккинчи президенти бўлиб, уни 1997 йилдан 2007 йилгача бошқарган. Учинчи президент Бако Саакян 2007- йилдан 2020 йилгача ушбу лавозимни эгаллаган.

• 19-сентябр куни Озарбайжон Тоғли Қорабоғда ҳарбий операция ўтказди, шундан сўнг тан олинмаган республика 2024 йил 1 январда ўз фаолиятини якунлаганини эълон қилди. 100 мингдан ортиқ этник арманлар ҳудудни тарк этди.
• 27-сентябр куни тан олинмаган республика ҳукуматининг собиқ раҳбари, миллиардер Рубен Варданян Қорабоғдан чиқиб кетмоқчи бўлганида қўлга олинди. Эртаси куни у ҳибсга олинди ва бир қанча жиноий айбловлар, жумладан, терроризмни молиялаштириш, ноқонуний қуролли гуруҳлар тузиш ва фаолиятида иштирок этишда айбланди.