Ғазо секторидан 7-октябр тонггида Исроил томон ўнлаб ракеталар учирилди, деб хабар беради Deutsche Welle.
Қайд этилишича, бир қатор шаҳарларда ҳаво ҳужумидан огоҳлантириш эълон қилинган ва ҳаво ҳужумидан мудофаа тизими ишга туширилган. Турар жой биноларига зарар етказилгани ҳақида хабарлар мавжуд. Дастлабки маълумотларга кўра, отишма натижасида бир исроиллик ҳалок бўлган, бир неча киши яраланган.
Исроил армияси матбуот хизмати хабарига кўра, ўқотар қуроллар билан қуролланган бир неча киши Ғазо секторидан мамлакатнинг чегара ҳудудларига кириб келган. Аҳолидан ўз уйида қолиш сўралмоқда.
Исроил бош вазири Бинямин Нетаняҳу яқин соатларда хавфсизлик тизими раҳбарияти билан тезкор учрашув ўтказади. Мудофаа вазирлиги захирадаги ҳарбийларнинг оммавий чақируви ва Ғазо секторидан 80 километр радиусда фавқулодда ҳолат жорий этилишини эълон қилган.
Шанба куни Исроил яҳудий календарига кўра Симхат-Тора байрамини нишонлайди. Байрам арафасида Ғарбий Соҳил ва Ғазо билан чегарадаги чегара пунктлари ёпилган.
HАMAS ҳарбий операция бошланганини эълон қилди
Фаластиннинг HАMAS ташкилоти ҳарбий қаноти қўмондони Муҳаммад Дейф ҳужумлардан сўнг Исроилга қарши ҳарбий операция бошланганини эълон қилди. HАMAS Исроил “жиноятлари”га чек қўйишга қатъий қарор қилди, дейди у. Ўз навбатида, Исроил мудофаа кучлари HАMAS ўз ҳужуми учун “жуда юқори нарх тўлашини” айтган.
Август охирларида Ғазо секторида ҳукмрон бўлган Фаластиннинг HАMAS ҳаракати Исроил билан кенг кўламли урушга тайёр, деганди ҳаракат сиёсий бюроси раҳбари ўринбосари Солиҳ ал-Арурий Ливаннинг Аl Mayadeen телеканалига берган интервьюсида. Сентябр ўрталарида эса Исроилнинг Ғазо билан чегарасидаги ажратувчи панжара ёнида содир бўлган портлашда камида беш нафар фаластинлик ҳалок бўлган, 25 нафари яраланган эди.
Изоҳ (0)