Тошкент шаҳар Мирзо Улуғбек туманидаги 148-сонли (собиқ 71-) умумтаълим мактабида ўқитувчи томонидан ўқувчини ургани ҳақида видеолар тарқалди. Шаҳар Мактабгача ва мактаб таълими бошқармаси ҳолат юзасидан маълумот берди.
Мазкур ҳолат туман ҳокимлиги ҳамда туман мактабгача ва мактаб таълими бўлими томонидан ўрганилди. Унга кўра, мактабда жорий йил давомида ўқувчиларни ватанпарварлик руҳида тарбиялаш мақсадида бепул ҳарбий спорт тўгараги ташкил этилган. Ижтимоий тармоқда тарқалган тасвирларда акс этган жараёнда ушбу мактабнинг 9-синф ўқувчиси А.А. томонидан 4-синф ўқувчиси П.Д.ни ургани акс эттирилган. Бугунги кунда П.Д.нинг саломатлигига ҳеч қандай зарар етмаган, соғлом.
Ҳолат бўйича туман ҳокимлиги, туман мактабгача ва мактаб таълими бўлими масъуллари томонидан ҳарбий спорт тўгараги фаолияти тугатилди. Ўқувчиларнинг ўзаро муносабатлари тўғрисида ўқувчилар ва уларнинг ота-оналари билан тушунтириш ишлари олиб борилди. Туман вояга етмаганлар ишлари бўйича комиссия хулосасига асосан иш олиб борилиши таъкидлаб ўтилди.
Изоҳ (0)