Шавкат Мирзиёев ва Владимир Путин учрашди. Қандай масалалар муҳокама қилинди?

Шавкат Мирзиёев ва Россия Федерацияси президенти Владимир Путиннинг тор доирадаги учрашуви бўлиб ўтди. Бу ҳақда Президент матбуот хизмати хабар берди.

Учрашув аввалида Шавкат Мирзиёев Владимир Путинга ҳар доимгидек самимий қабул ва меҳмондўстлик учун миннатдорлик билдириб, мамлакатлар ўртасидаги стратегик шериклик ва иттифоқчилик муносабатларининг бугунги ҳолатини юксак баҳолади. Томонлар Ўзбекистон билан Россия ўртасидаги кўп қиррали ҳамкорликнинг жадал суръатини қайд этди.

Ушбу олий даражадаги ташрифга тайёргарлик доирасида бир қатор тадбирлар, шу жумладан Ҳукумат раҳбарлари даражасидаги қўшма комиссиянинг тўртинчи йиғилиши, тиббиёт, ректорлар ва ҳудудлар форумлари муваффақиятли ўтказилгани таъкидланди. Саноат кооперацияси жадал ривожланмоқда. Ўзбекистонда Россия инвестисиялари ҳажми ошиб бормоқда.

Президентлар ҳудудлар ўртасидаги ҳамкорликни янада ривожлантириш муҳим эканини қайд этди. 4-октябр куни Қозон шаҳрида ўтган учинчи Ҳудудлараро ҳамкорлик форуми якунида 3,5 миллиард долларлик битим ва шартномалар имзоланди.

Ҳудудлар кесимида саноат кооперацияси бўйича йил бўйи ўзаро ташрифлар режа-жадвалини ўз ичига олган “йўл харитаси”ни тайёрлаш юзасидан келишувга эришилди. Учрашув чоғида Россияда меҳнат фаолиятини амалга ошираётган Ўзбекистон фуқаролари учун ижтимоий кафолатларни таъминлаш масалалари ҳам батафсил кўриб чиқилди.

Куни кеча Бутунроссия кўргазма марказида Ўзбекистоннинг янгиланган павилони очилди. Президентлар тадбирларга бой ва серқирра маданий-гуманитар ҳамкорликни юқори баҳолади. Муҳим маданий воқеалар: Москвада “Лазги” миллий балети премераси, Ўзбекистон маданияти кунлари, мамлакатда эса “Россия фасллари” лойиҳаси доирасидаги тадбирлар бўлиб ўтди.

Давлат раҳбарлари 2024-2025 йилларга мўлжалланган Маданий ҳамкорлик дастурини қабул қилишга келишиб олди. Томонларни қизиқтирган минтақавий ва халқаро аҳамиятга молик масалалар юзасидан фикр алмашилди.

Самимий ва дўстона ўтган учрашув якунида томонлар кенг қамровли стратегик шериклик ва иттифоқчилик муносабатларини янада мустаҳкалаш борасидаги интилиш қатъий эканини яна бир бор тасдиқлади.