Санитар тозалаш ишларини ташкил этиш республика маркази раҳбари Шарифбек Ҳасанов Швециянинг Ўзбекистондаги элчиси Томас Данестад ҳамда Швеция чиқиндиларни бошқариш ва қайта ишлаш уюшмаси катта маслаҳатчиси Верн Виквист билан учрашди.
Қайд этиш бўйича, чиқиндиларни бошқариш бўйича Швеция илғор тажрибасини Ўзбекистон шароитида амалиётга жорий этиш юзасидан бир қатор чора-тадбирлар олиб борилмоқда.
Учрашувда Ўзбекистон ва Швеция ўртасида чиқиндиларни бошқариш ва тизимга илғор хорижий тажрибани жорий этишни жадаллаштириш масаласи муҳокама қилинган. Шунингдек, мамлакатда чиқиндилар бўйича вазиятни, жумладан, ушбу соҳадаги қисқа ва узоқ муддатли эҳтиёжларни ўрганиш ҳамда таҳлил қилиш масалалари юзасидан ўзаро фикр-мулоҳазалар алмашилган.
Бундан ташқари, Швециянинг чиқиндиларни бошқариш моделига асосан чиқиндиларни қайта ишлаш ҳамда ундан энергия ишлаб чиқаришга урғу берилган.
“Чиқиндиларни энергияга айлантиришнинг инновацион технологияларини ишлаб чиқиш, барқарор лойиҳалаш ва ҳаётга татбиқ этилишига алоҳида аҳамият қаратилди”, — дейилади хабарда.
Аввалроқ Тошкент вилояти Оҳангарон тумани ҳудудида 2023 йил ноябрь ойигача янги маиший чиқинди полигони ташкил этилиши тўғрисида хабар берилганди. Шунингдек, мамлакатда 2024 йил 1 январгача янги юк ташувчи транспорт воситаларини (чиқинди ташиш машиналари ва самосваллар) импорт қилишда божхона божи ставкаси 5 фоиз миқдорида ўрнатилади ва улар утилизация йиғимидан озод қилинган.
Изоҳ (0)