Экология, атроф-муҳитни муҳофаза қилиш ва иқлим ўзгариши вазирлиги давлат инспекторлари томонидан Тошкент вилояти ва Тошкент шаҳар ҳудудларида тезкор рейд тадбирлари ўтказилди. Бу ҳақда вазирлик матбуот хизмати хабар берди.
Қайд этилишича, тезкор тадбирлар давомида Тошкент шаҳри Сергели тумани “Қумариқ” маҳалласи ҳудудида тақиқланган ов қуроллари ёрдамида тўққизта бедана овланилгани аниқланган.
Ҳолат юзасидан ҳуқуқбузарга нисбатан Маъмурий жавобгарлик тўғрисидаги кодекснинг 90-моддаси 1-қисми билан базавий ҳисоблаш миқдорининг беш баробари — 1 миллион 650 минг сўм миқдорида жарима белгиланди.
Шунингдек, ноқонуний ов қуроллари қонуний тўхтамга келгунга қадар вақтинчалик олиб қўйилган. Беданалар давлат инспекторлари томонидан табиат қўйнига қўйиб юборилган.
- Бир неча кун олдин Жиззах вилоятида 541 та балиқ ноқонуний овланиб, табиатга 178 миллион 530 минг сўм зарар етказилгани аниқланганди.
- Ушбу ҳудудда апрель ойида ўтказилган рейд давомида электр қармоқлардан фойдаланган ҳолда ноқонуний балиқ овлаётганлар аниқланганди.
- Ўшанда фуқаролардан бири хизмат вазифасини бажараётган ходимларнинг қонуний талабларини бажармасдан, уларга фаол қаршилик кўрсатиб, ноқонуний овлаган балиқлари ва бошқа ашёвий далилларни йўқ қилиш мақсадида ўзининг Nexia-3 ни департамент бўлим бошлиғи устига ҳайдаб, унинг ҳаёти ва соғлиғига хавф туғдириш орқали тан жароҳати етказганди.
Изоҳ (0)