Самарқанд вилоятида тўртта корхона 1 миллиард 294 миллион сўмлик табиий газдан ноқонуний фойдалангани аниқланди, деб хабар беради Энергетика вазирлиги матбуот хизмати.
Қайд этилишича, “Ўзэнергоинспекция” томонидан тегишли органлар билан ҳамкорликда Самарқанд вилоятида ўтказилган назорат тадбирларида табиий газдан ноқонуний фойдаланиш ҳолатлари аниқланган. Хусусан:
- Паст Дарғом туманидаги “А.Б.” фермер хўжалигига қарашли ошхона (428 миллион 364 минг сўм) ҳамда ушбу туманидаги “Ф.З.Д.” оилавий корхонасига қарашли тўйхона газ тармоғига ўзбошимчалик билан улангани натижасида давлат манфаатларига 520 миллион 344 минг сўм;
- Оқдарё туманидаги “И.С.О.” оилавий корхонасига қарашли тўйхона газ тармоғига ноқонуний улангани натижасида давлат манфаатларига 231 миллион152 минг сўм;
- Пахтачи туманидаги “А.У.А.Ҳ.777” МЧЖ газ тармоғига ноқонуний улангани натижасида давлат манфаатларига 114 миллион 374 минг сўм зарар етказган.
Мазкур тўртта ҳолатда салкам 1,3 миллиард сўм (1 миллион 353 минг 154 метр куб) зарар етказилган. Ушбу миқдордаги табиий газ ҳозирги кунда 6 минг 765 та хонадоннинг бир ойлик истеъмолига тенгдир.
Қоидабузар истеъмолчиларга нисбатан белгиланган тартибда чоралар кўриш учун тегишли ҳужжатлар ҳуқуқни муҳофаза этувчи органларга тақдим қилинган.
Аввалроқ Жиззах шаҳридаги МЧЖ 3 млрд 840 млн сўм ёки 19 200 та хонадоннинг бир ойлик истеъмолига тенг миқдордаги табиий газдан ноқонуний фойдалангани аниқланганди. Шунингдек, Тошкентда салкам 530 млн сўмлик газдан ноқонуний фойдаланилгани, Ўзбекистонда бир ойда электр ва газдан ноқонуний фойдаланиш оқибатида тизимга қанча зарар етгани тўғрисида хабар берилган эди.
Изоҳ (0)