“Бир инсон ҳар куни ўртача 650—750 грамм чиқинди ҳосил қиляпти”. Экология вазирлиги масъули Ўзбекистонда маиший чиқиндилар ҳажми ошиб кетганини айтди

Экология, атроф-муҳитни муҳофаза қилиш ва иқлим ўзгариши вазирлиги 18 июль куни Тошкент шаҳри Янгиҳаёт туманидаги ProfPack чиқиндиларни қайта ишлаш корхонасига пресс-тур уюштирди. Тадбир давомида Экология, атроф-муҳитни муҳофаза қилиш ва иқлим ўзгариши вазирлиги бошқарма бошлиғи Умар Абдуллаев мамлакатда чиқиндиларни қайта ишлаш соҳасида амалга оширилаётган ишлар ҳақида маълумот берди.

Айтилишича, ProfPack қоғоз чиқинди ва макалатураларни қайта ишловчи корхона бўлиб, кунига 2 минг тонна қоғоз қайта ишланади.

“Республика аҳолиси сонининг ошиб бориши, турмуш даражасининг яхшиланиши, маҳсулотларнинг турлари кўпайиб бориши билан чиқиндиларнинг кўриниши ва ҳажми ҳам ортиб бормоқда. Чиқиндилар билан кузатиладиган энг катта муаммо — бу уларни ўз вақтида утилизация қилиш масаласи, улардан самарали фойдаланиш, айланма иқтисодиёт орқали қайта ишга тушириш керак. Республикада ҳар йили ўртача 7 миллион тонна маиший чиқинди ҳосил бўлади. Бу оилада ўртача ҳар бир киши кунига 650—750 грамм чиқинди чиқаради, дегани. Энди бу чиқиндиларнинг тақдири нима бўлади?” — дейди Умар Абдуллаев.

Бошқарма бошлиғининг билдиришича, ҳозирда республикада ҳосил бўладиган чиқиндиларнинг учдан бир қисмигина қайта ишланади.

“Бизда ҳозирча чиқиндиларни саралаш-йиғиш тизими йўлга қўйилмаган. Чиқиндихоналар, полигонларда қайта ишлашга яроқли бўлган кўплаб чиқиндилар бошқа, яроқсизлари таркибига аралаштириб юборилади. Агар мана шундай қоғозларни қайта ишловчи корхоналарга чиқиндилар сараланган ҳолда етиб келганида эди, жуда кўпини қайта ишлаш имкони бўларди. Ҳозир республикада 300 га яқин чиқиндини қайта ишловчи корхоналар бор, улар узоғи билан 25—30 фоизгача чиқиндини қайта ишлаши мумкин”, — дея тушунтирди у.

Таъкидланишича, инсон саломатлигига зарар етказадиган воситалар ҳозирча қайта ишланмаяпти.

“Бизда асосан қоғоз, пластик, металл чиқиндилар ва суяк, тери каби материаллар қайта ишланади. Атроф-муҳит ва инсонлар соғлиғига кўпроқ зарар кўрсатадиган гигиеник, кимёвий воситалар, болалар тагликлари, мой ва бўёқларни биз ҳали қайта ишлолмаяпмиз. Лекин ҳозирда президент қарори билан чиқиндиларни саралаш тизимини босқичма-босқич яхшилаш ишлари олиб борилмоқда”, — деб қўшимча қилди Экология вазирлиги масъули.